Ілюзорная канцэпцыя "чырвоных ліній" рассыпалася пад Суджай — Зяленскі

Уладзімір Зяленскі падчас выступу на нарадзе кіраўнікоў замежных дыпламатычных устаноў Украіны пракаментаваў украінскую аперацыю ў Курскай вобласці РФ і яе значэнне.

"Яшчэ некалькі месяцаў таму шмат хто ў свеце, калі б пачуў, што мы плануем такую аперацыю, як у Курскай вобласці, сказалі б, што гэта нерэальна і што гэта пераход нібыта найбольш чырвонай з усіх чырвоных ліній, якія ёсць у Расіі, — кажа Зяленскі. — Менавіта таму, уласна, ніхто і не чуў пра такую нашую падрыхтоўку. І цяпер рэальны поспех нашых воінаў кажа сам за сябе: нашы актыўныя абарончыя дзеянні па той бок мяжы і няздольнасць Пуціна зберагчы сваю тэрыторыю ад такіх нашых абарончых дзеянняў вельмі красамоўныя".

Украінскі прэзідэнт перакананы, што такая "актыўная прэвентыўная абарона з'яўляецца найбольш эфектыўным процідзеяннем расійскаму тэрору і забеспячэннем рэальнага ўскладненні сітуацыі для дзяржавы-агрэсара". Таксама ён падкрэслівае "надзвычай важнае ідэалагічнае змяненне" ў выніку жнівеньскай аперацыі.

"Уся наіўная, ілюзорная канцэпцыя так званых чырвоных ліній у дачыненні да Расіі, якая панавала ў ацэнках вайны некаторых партнёраў, рассыпалася ў гэтыя дні дзесьці пад Суджай, — кажа Уладзімір Зяленскі. — Свет бачыць, што ўсё ў гэтай вайне залежыць толькі ад смеласці — смеласці нашай, смеласці партнёраў. Ад смелых рашэнняў для Украіны, ад смеласці ў падтрымцы Украіны і смелых крокаў — і не толькі нашых крокаў. Важна, каб партнёры былі сінхроннымі з намі ў гэтай рашучасці, і тады ў Расіі не застанецца ніводнага іншага кроку, акрамя справядлівага міру".

Як піша The Economist, галоўнакамандуючы УСУ Аляксандр Сырскі да апошняга трымаў у таямніцы план Курскай аперацыі. Пра яе ведала невялікая група генералаў і сілавікоў. З Уладзімірам Зяленскім пра аперацыю Сырскі размаўляў толькі сам на сам.

Зяленскі заявіў, што УСУ кантралююць у Курскай вобласці 92 населеныя пункты і больш за 1250 квадратных кіламетраў. "Калі б партнёры знялі ўсе наяўныя абмежаванні на ўжыванне [дальнабойнай] зброі па тэрыторыі Расіі, нам не спатрэбілася б фізічная аперацыя, у прыватнасці ў Курскай вобласці", — адзначыў 19 жніўня ўкраінскі прэзідэнт.