Начальнік аддзела з МТС затрыманы за "зліў" інфармацыі ў "Чорную кнігу Беларусі"
Затрыманы ў Мінску супрацоўнік МТС
У Мінску за "зліў" асабістых звестак сілавікоў і высокапастаўленых службовых асоб у "Чорную кнігу Беларусі" затрыманы начальнік аддзела з МТС. Мужчына супрацоўнічаў з ЧКБ каля года і перадаў дадзеныя пра 100 абанентаў і іх званкі.
Кадры з затрыманым распаўсюджваюць праўладныя тэлеграм-каналы. "Начальнік аддзела буйной кампаніі мабільнай сувязі, карыстаючыся сваім службовым становішчам, па заданнях з-за мяжы незаконна ажыццяўляў доступ да канфідэнцыйнай базы не толькі асабістых дадзеных, але і тэлефонных злучэнняў абанентаў", — пішуць там.
Затрыманы мужчына расказвае пра сябе, што працуе ў МТС начальнікам аддзела білінгу і тарыфікацыі. На камеру яго прымусілі сказаць, што ён супрацоўнічаў з "Чорнай кнігай Беларусі" каля года — да чэрвеня 2021-га. За гэты час ён паспеў перадаць супернікам Лукашэнкі звесткі пра больш чым 100 грамадзян.
Дома ў менеджара знайшлі БЧБ-сцяг і — трэба ж! — грошы.
Тэлеграм-канал "Чорная кніга Беларусі" спецыялізаваўся на публікацыі асабістых дадзеных сілавікоў і прадстаўнікоў беларускіх уладаў, датычных да рэпрэсій. Нядаўна высветлілася, што цягам 9 месяцаў у адміністрацыі канала быў супрацоўнік ГУБАЗіК. Пэўны час ён нават кіраваў ЧКБ.
