Польшча хоча зрабіць плот на сваёй мяжы непраходным

Польская памежная служба мадэрнізуе плот на мяжы з Беларуссю, піша мясцовае выданне WNP. Кантракт з кампаніяй, якая будзе займацца ўмацаваннем збудавання, ужо падпісаны.

"Мадэрнізацыя адназначна ўскладніць і нават прадухіліць расцяжэнне пралётаў (плота) аўтамабільнымі дамкратамі. А гэта цяпер самы распаўсюджаны спосаб спробаў фарсіраваць мяжу", — кажа намеснік кіраўніка Міністэрства ўнутраных спраў і адміністрацыі Мацей Душчык.

Будаўніцтва сталёвага плота на мяжы Беларусі і Польшчы было завершанае ў чэрвені 2022 года. Гэты бар'ер расцягнуўся на 186 кіламетраў, яго вышыня — больш за пяць метраў.

Плануецца таксама ўзмацніць электронныя сродкі абароны мяжы, дадаць больш камер сачэння. Таксама будзе ўсталяванае дадатковае асвятленне памежнай тэрыторыі.

Міграцыйны крызіс на мяжы Беларусі і ЕС пачаўся ў 2021 годзе. У траўні 2024 года смяротнае раненне атрымаў польскі салдат, задзейнічаны ў ахове мяжы. Ён атрымаў удар нажом з боку беларускай мяжы, калі спрабаваў затрымаць мігранта. У сталёвым плоце на мяжы мігранты прарабілі пралом, і салдат спрабаваў шчытом перакрыць яго. У гэты момант яго ўдарылі нажом.

МЗС Польшчы запатрабаваў ад Беларусі выдаць чалавека, якога падазраюць у забойстве салдата.