Раман Пратасевіч выступіць сведкам на судзе над Эдуардам Пальчысам

Раман Пратасевіч праходзіць сведкам на судзе над Эдуардам Пальчысам, паведамляе "Наша Ніва". Дэталі аб тым, калі ён выступіць, пакуль невядомыя.

Пратасевіч некалькі месяцаў не з'яўляецца ў публічным полі. Хоць раней на хатнім арышце нават меў магчымасць пісаць у сацсеткі.   

6 снежня ў Мінску пачаўся суд над блогерам Эдуардам Пальчысам. Ён за кратамі з верасня 2020-га. Абвінавачванне выстаўлена адразу па чатырох артыкулах Крымінальнага кодэкса. Справу разглядае Мінскі гарадскі суд. Суддзя Пётр Арлоў зрабіў суд закрытым.

Пальчыс прызнаны палітвязнем. Ён адмовіўся ўставаць у судзе, сказаўшы, што "не лічыць гэта судом".