Расія скарачае транзіт нафты па "Дружбе" — колькі і чаго недаатрымае Беларусь
Расія скарачае транзіт нафты па "Дружбе" / Reuters
У ліпені Расія пераразмяркуе пастаўкі нафты маркі Urals у Еўрасаюз. Гэта вымушаная мера. У рамках дамоўленасцяў з АПЕК+ здабыча нафты скарачаецца, і расійскія пастаўшчыкі адчуваюць складанасці з выкананнем доўгатэрміновых кантрактаў па іншых напрамках.
Сёння расійская нафта цячэ ў ЕС па дзвюх ветках нафтаправода "Дружба". Замест чэрвеньскіх 2 млн 850 тысяч тон у Польшчу і Германію па паўночнай ветцы будзе прапампавана 2 млн 500 тысяч тон. Прыблізна на такую ж велічыню вырасце транзіт па паўднёвай ветцы — за кошт аднаўлення паставак у Чэхію. Як гэта адаб'ецца на Беларусі?
Нафта цячэ туды, дзе даражэйшая
Расійскі эканаміст, аналітык нафтагазавага сектара, партнёр Rusenergy Міхаіл Круціхін мяркуе, што ў сітуацыі памяншэння здабычы расійскія пастаўшчыкі будуць прадаваць нафту там, дзе цэны вышэйшыя:
"На мінулым тыдні цана расійскай маркі Urals была на 2 долары 40 цэнтаў вышэйшая, чым цана Dated Brent. Яны дзесьці ў Еўропе атрымліваюць прэмію да цаны сваёй нафты. Я не выключаю, што такім чынам яны будуць старацца пастаўляць менш беларускім НПЗ, дзе ім такую цану не атрымаць. А больш [будуць пастаўляць] транзітам кудысьці ў Еўропу далей, дзе цана вышэйшая.
Расія па дамоўленасці з АПЕК+ скараціла здабычу і ў прынцыпе будзе не моцна павялічваць яе і ў жніўні, і гэта можа і далей працягвацца. Вядома, гэта павінна паўплываць на Беларусь. Паколькі расійскім кампаніям трэба рэалізоўваць паменшаныя аб'ёмы нафты выгадна, яны будуць старацца іх прадаваць там, дзе цэны вышэйшыя".
А транзіт?
Паралельна скарачэнню паставак па паўночнай ветцы "Дружбы" вырастуць пастаўкі "Раснафты" і "Татнафты" па паўднёвай ветцы. Расійскія пастаўшчыкі аднаўляюць экспарт у Чэхію. Адгрузкі ў гэту краіну запланаваны на ўзроўні 350 тысяч тон у месяц.
За транзіт 1 тоны нафты па паўночным маршруце "Унеча — Адамава Застава" ў бок Польшчы і Германіі наша краіна атрымлівае $5, або каля 356 расійскіх рублёў (без ПДВ). Транзіт 1 тоны нафты па больш кароткай паўднёвай ветцы "Унеча — Броды" ў бок Украіны каштуе да 156 расійскіх рублёў (без ПДВ).
Атрымліваецца, што за 350 тысяч тон па паўночным маршруце нафтаправода "Дружба" Беларусь атрымала б каля 1 млн 780 тысяч долараў, і гэта без ПДВ. А па паўднёвым маршруце за тую ж колькасць транзітнай нафты Беларусь атрымае толькі каля 780 тысяч долараў. Розніца складзе каля $1 млн.
"Дружба" не перасохне
У канцэрне "Белнафтахім" упэўненыя, што абмежаванні па здабычы нафты ў рамках пакта АПЕК+ не закрануць Беларусь:
"Пакуль нічога такога, што б неяк паўплывала на пастаўкі нафты ў Беларусь, няма. Я не думаю, што для расійскіх кампаній такія аб'ёмы істотныя, — расказвае Еўрарадыё прэс-сакратар "Белнафтахіма" Аляксандр Цішчанка. — Мне здаецца, што 350 тысяч тон — не адчувальная лічба. Я б сказаў, што ў гэтым выпадку — хібнасць. Яны толькі ў Беларусь у гэтым месяцы паўтара мільёна тон паставяць".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
