Стала вядома, як сілавікі маглі атрымаць доступ да бота "Беларускага Гаюна"

Доступ да бота "Беларускага Гаюна" сілавікі маглі атрымаць пасля затрыманняў актывістаў. Такую версію прапануе "Наша Ніва".

Паводле інфармацыі выдання, на мінулым тыдні ў Беларусі затрымалі дваіх актывістаў — хлопца і дзяўчыну. Яны доўга былі ў вышуку, але заставаліся ў Беларусі. Апошнім часам пара хавалася ад пераследу пад Мінскам.

Тыдзень таму дзяўчына перастала выходзіць на сувязь, а неўзабаве прыйшлі весткі пра яе затрыманне.

Можна меркаваць, што ў яе мабільніку знайшлі старую запрашальную спасылку ў чат, куды перасылалі кантэнт з бота "Гаюна". Паведамляецца, што актывістка забыла выдаліць яе. Скарыстаўшыся неадкліканай спасылкай, сілавікі змаглі атрымаць доступ да чата.

Тг-канал ГУБАЗіКа апублікаваў нібыта скрыншот перапіскі дзяўчыны з Антонам Матолькам. Але яе сябры сцвярджаюць, што яна не піша ў такім стылі. Не выключана, што сілавікі проста сфабрыкавалі "перапіску".

Пра ўзлом чат-бота "Беларускага Гаюна" паведаміў сёння Антон Матолька. Ён папярэдзіў, што ўсе людзі, якія пісалі ў бот, знаходзяцца ў Беларусі пад пагрозай. Фонд BYSOL адкрыў "гарачую лінію" для людзей, якія ў выніку ўзлому апынуліся пад пагрозай.