Тактычныя ядзерныя боепрыпасы: чым да суднага дня ўзброіліся Расія і НАТА

Пуцін можа ўдарыць ядзернай зброяй па Польшчы. Маўляў, каб Захад спалохаўся, адмовіўся ад удзелу ў ядзернай вайне і перастаў падтрымліваць Украіну.

Пра тое, што ёсць у арсенале ў саперніцкіх бакоў, расказвае мілітары-канал "Информация".

Чым можа адказаць НАТА

Вайна з ужываннем стратэгічнай ядзернай зброі пагражае непапраўнай сусветнай катастрофай. Таму калі зброя масавага паражэння і будзе выкарыстоўвацца ў гіпатэтычным канфлікце звышдзяржаў, то, хутчэй за ўсё, гэта будуць тактычныя ядзерныя боепрыпасы.

— Да 2022 года з боку ЗША ёсць блізу 230 тактычных ядзерных боезарадаў і больш за дзве тысячы з боку Расіі, — расказвае ваенны аглядальнік канала "Информация". — Пры гэтым большая частка зарадаў ЗША знаходзіцца ў складзе авіяцыйных бомбаў B61. На базах у Бельгіі, Германіі, Італіі, Нідэрландах і, да нядаўніх часоў, у Турцыі такіх размешчана каля 150 штук.

В61 — гэта звычайная гравітацыйная бомба без так званай standoff capability [без магчымасці знішчыць аб'ект, знаходзячыся па-за зонай паражэння СПА праціўніка. — Еўрарадыё]. Яе трэба скідаць з вышыні 8000+ метраў практычна над самай цэллю, што ва ўмовах сістэмы СПА над, умоўна, Беларуссю ці Калінінградам практычна немагчыма.

Крылатыя ракеты ЗША

Акрамя B61, ядзерныя зарады могуць быць дастаўлены пры дапамозе крылатых ракет тыпу AGM-86B ALCM.

— Гэта даволі добрая крылатая ракета, — працягвае ваенны аглядальнік "Информации". — На ўзбраенне яна была пастаўленая ў пачатку 80-х. Быў і больш сучасны варыянт — AGM-129 ACM, але яго знялі з узбраення ў 2012 годзе [ў сувязі з падпісаннем пагадненняў аб раззбраенні]. Распрацаваны AGM-129 быў таму, што AGM-86B не гарантавала дастаўку зарада да цэлі, паколькі даволі лёгка выяўлялася перспектыўнымі сродкамі ранняга выяўлення СССР і радарамі "Заслон", "Меч", усталяванымі на самалётах МіГ-31 і Су-27.

Не выпадае спадзявацца, што AGM прарвуцца праз сучасную эшаланаваную сістэму СПА [змяшаную групоўку зенітных ракетных сістэм вялікай, сярэдняй і малой далёкасці, якія працуюць у звязцы], ды яшчэ і з А-50 [расійскімі самалётамі далёкага радыёлакацыйнага выяўлення], якія кружаць над Беларуссю. Больш таго, тэрмін прыдатнасці AGM-86B нават пасля праграмы па яго падаўжэнні скончыўся ў 2020 годзе.

Сучасны варыянт крылатай ракеты для дастаўкі ядзерных зарадаў AGM-181 LRSO дагэтуль знаходзіцца на стадыі распрацоўкі і павінен з'явіцца прыкладна адначасова з бамбардзіроўшчыкамі B-21 Raider.

Знішчыць праціўніка няядзернай зброяй

— Згодна з дактрынай, у адказ на ўдар тактычнай ядзернай зброяй па тэрыторыі Польшчы НАТА адкажа абмежаваным ударам, — піша "Информация". — Напрыклад, у адказ на адзін зарад па польскім горадзе Жэшаў удараць двума-трыма зарадамі па Калінінградзе і Беларусі. Эфектыўнасць такога адказу, шчыра кажучы, сумнеўная. Захад даўно пераарыентаваў сваю моц на канвенцыйныя (няядзерныя) сродкі паражэння, якімі яны могуць нанесці гарантавана большы і больш эфектыўны ўдар.

— У апошнія гады была дададзеная магчымасць выбару магутнасці для боегаловак W76, што выкарыстоўваюцца ў ракетах Trident II, якія размяшчаюцца на падводных лодках. Гэта дазваляе панізіць іх магутнасць да пяці кілатон, што таксама ўводзіць іх у катэгорыю тактычных. Але іх запуск напэўна справакуе поўнамаштабны ўдар у адказ, бо да моманту пападання і выбуху невядома, боегалоўка якой магутнасці ўсталяваная на запушчанай ракеце.
 

Расійскія "брудныя бомбы"

Апошнія два дзесяцігоддзі Расія не спяшалася пазбаўляцца ад савецкіх запасаў тактычных ядзерных зарадаў, а таксама распрацоўвала новыя.

— Сярод іх так званыя enhanced radiation warheads — ERW, — расказвае аглядальнік "Информации". — Большая частка энергіі гэтых зарадаў вылучаецца ў выглядзе хуткіх часціц, якія наносяць нашмат менш пашкоджанняў выбуховай хваляй, але знішчаюць жывую сілу і электроніку. У народзе іх называюць нейтроннымі бомбамі. Гэта "брудныя" боепрыпасы суднага дня, якія забруджваюць велізарныя плошчы ізатопамі кобальту-60 і робяць іх непрыдатнымі для жыцця на дзесяцігоддзі. Хоць яны, вядома, адносяцца да стратэгічнай ядзернай зброі.

РФ на сённяшні дзень валодае дастатковай колькасцю сродкаў дастаўкі ядзерных зарадаў.

— Гэта і 203-міліметровыя САУ "Малка", якія ўжо актыўна ўжываюцца ва Украіне [ў няядзерным абсталяванні. — Еўрарадыё]. Крылатыя ракеты Х-55, Х-102, "Калібр", "Іскандэр-К", "Цыркон", супрацькарабельныя П-500/700/800/1000, аэрабалістычныя ракеты комплексу "Іскандэр-М". Большасць з іх мае ў сваім складзе сродкі пераадолення супрацьпаветранай і супрацьракетнай абароны, — адзначае аглядальнік "Информации".

— Сэнсу наносіць удар [Расіі] па Украіне я не бачу. Хутчэй за ўсё, ён будзе нанесены па Польшчы ці Румыніі. І, асабіста на маю думку, ён хутчэй будзе нанесены, чым не, — дае несуцяшальны прагноз ваенны аглядальнік "Информации".