У план РФ здзейсніць дзяржпераварот у Малдове задзейнічаны найміты з Беларусі

Расія плануе здзейсніць у Малдове дзяржаўны пераварот з захопам закладнікаў. Пра гэта 13 лютага на прэс-брыфінгу заявіла прэзідэнт Мая Санду. Паводле яе слоў, Масква хоча задзейнічаць пратэсты апазіцыі ў Малдове і прыцягнуць людзей з вайсковай падрыхтоўкай, а таксама грамадзян Расіі, Беларусі, Сербіі і Чарнагорыі — "дыверсанты ў цывільным". Іх мэта — захоп урадавых будынкаў, каб дамагчыся змены ўлады ў краіне, паведамляе newsmaker.md.

Санду нагадала, што яшчэ летась рабіліся спробы дэстабілізаваць сітуацыю ў Малдове. Але ўлады сарвалі гэтыя планы. Расія ж ад іх не адмаўляецца. Прэзідэнт Малдовы спасылаецца на "дакументы, атрыманыя ад... украінскіх партнёраў". Сярод іх ёсць і інструкцыя для беларусаў, расіян з правіламі ўезду ў краіну.

Мая Санду запэўнівае, што дзяржаўныя органы бяспекі працуюць над недапушчэннем здзяйснення запланаваных Масквой правакацый. Раней пра расійскі план у дачыненні Малдовы расказаў украінскі прэзідэнт Уладзімір Зяленскі.