У праўладны Саюз журналістаў Беларусі прыйшла фэйкавая праверка
Кіраўнік Беларускага саюза журналістаў Андрэй Крывашэеў / soyuz.by
Да чальцоў праўладнага Беларускага саюза журналістаў (БСЖ) прыйшла фэйкавая праверка. Падрабязнасці гісторыі расказаў адзін з праўладных тг-каналаў.
Галоўнай рэдактарцы адной з газет Магілёўскай вобласці прыйшло ў тэлеграме паведамленне ад імя старшыні БСЖ Андрэя Крывашэева. Ён папярэджвае, што з ёй звяжацца правяраючы Сяргей Уладзіміравіч Мацкевіч. Насамрэч гэта фэйкавае паведамленне з фэйкавага акаўнту, заяўляюць аўтары праўладнага каналу.
Яны прымацавалі скрыншот перапіскі. Яна вядзецца ад імя Крывашэева "Ірынай Іванаўнай" (відавочна, гэта галоўная рэдактарка холдынгу "Магілёўскія ведамасці" Ірына Петрусевіч). Выглядае як перапіска начальніка і падначаленай. Прычым кіраўніца магілёўскага СМІ не сумняваецца, што да яе звяртаецца старшыня БСЖ.
Сам Крывашэеў заяўляе, што такія паведамленні не адпраўляў.
Раней беларускі пранкер Уладзіслаў Бохан не аднойчы ладзіў розыгрышы з настаўнікамі ў Беларусі і Расіі.
