Славакі масава мітынгавалі супраць прарасійскага прэм’ера Роберта Фіца
Людзі запальваюць экраны тэлефонаў у Браціславе, Славакія, калі тысячы збіраюцца пратэставаць супраць палітыкі прэм'ер-міністра Роберта Фіца / Дэнэш Эрдэш / AP
У пятніцу, 24 студзеня, каля 60 тысяч чалавек сабраліся ў Браціславе, каб выказаць пратэст супраць палітычных рашэнняў прэм’ер-міністра Роберта Фіца, якія збліжаюць краіну з Расіяй. Мітынгі таксама прайшлі ў дваццаці іншых гарадах. У Браціслаўскай Плошчы Свабоды арганізатары ацанілі колькасць удзельнікаў на 60 тысяч чалавек – гэта ў чатыры разы больш, чым падчас апошніх пратэстаў два тыдні таму. Людзі скандзіравалі “Хопіць Фіца” і “Мы – Еўропа”, а таксама асвяцілі плошчу экранамі тэлефонаў пасля кароткага адключэння электрычнасці.
Сітуацыя ў краіне абвастрылася пасля таго, як урад Фіца абвінаваціў прагрэсіўных апанентаў у спробах “дзяржаўнага перавароту”. Урад абвясціў пра новыя меры супраць пратэстоўцаў, заявіўшы, што яны могуць перарасці ў захоп дзяржаўных будынкаў. Сам Фіца без доказаў сцвярджае, што групы экспертаў у Славакіі нібыта дапамагалі арганізацыі пратэстаў супраць прарасійскіх лідараў ва Украіне і Грузіі. У адказ апазіцыйныя партыі і грамадзянскія арганізацыі назвалі гэтыя абвінавачанні спробай адцягнуць увагу ад праблем у палітыцы.
Фіца, які зноў стаў прэм’ерам у 2023 годзе, выклікае занепакоенасць сваімі дзеяннямі, што, на думку крытыкаў, аслабляюць дэмакратычныя каштоўнасці і змяняюць вектар вонкавай палітыкі ад ЕС і НАТА ў бок Расіі. Сітуацыя яшчэ больш абвастрылася пасля яго прыватнага візіту ў Маскву і сустрэчы з Пуціным у снежні. Урад таксама спыніў ваенную дапамогу Украіне і змякчыў пакаранні за эканамічныя злачынствы. Пратэстоўцы настойваюць на неабходнасці захаваць еўрапейскі курс і працягнуць супрацоўніцтва з НАТА, заклікаючы ўрад перагледзець сваю палітыку.
