За вывешаныя сцягі Беларусі і Украіны асудзілі пяцярых палітвязняў
Амаль усім прысудзілі па 5 гадоў калоніі.
У Мінскім гарадскім судзе вынеслі прысуд па "справе сцягоў", паведамляюць праваабаронцы.
Суддзя Дзіна Кучук прызначыла Дзянісу Варозаву і Вячаславу Панцюшэнку па 5 гадоў калоніі ўзмоцненага рэжыму. Вольга Церах і Кацярына Зарэцкая былі асуджаныя на 5 гадоў калоніі агульнага рэжыму. А Уладзіміру Лавору прысудзілі 4 гады і 9 месяцаў калоніі ўзмоцненага рэжыму.
Усіх пяцярых праваабаронцы прызналі палітвязнямі.
Суд быў закрытым. На першым жа пасяджэнні дзяржаўны абвінаваўца заявіў такое хадайніцтва, каб прадухіліць "распаўсюд экстрэмісцкіх матэрыялаў".
Пяцярых мінчукоў затрымалі ў сярэдзіне верасня 2022 года. Іх абвінавацілі ў тым, што яны вывесілі вялікія нацыянальныя сцягі Беларусі і Украіны на фасадзе дома па вуліцы Лесі Украінкі ў Мінску.
