Затрыманых праваабаронцаў і актывістаў прызналі палівязнямі

Затрыманых праваабаронцаў і актывістаў прызналі палівязнямі

Праваабаронцы прызналі палітычнымі зняволенымі актывістаў, затрыманых 14 ліпеня.

Як распавядала Еўрарадыё, у гэты дзень ператрусы прайшлі ў офісах дзясяткаў грамадскіх арганізацый па ўсёй краіне. Дзясяткі чалавек былі затрыманыя і дапытаныя, многіх з іх адпусцілі. Аднак частку пакінулі за кратамі

"Пасля ператрусаў па ўсёй Беларусі былі затрыманыя праваабаронцы і актывісты:

Уладзімір Лабковіч, юрыст "Вясны"

Ніна Лабковіч, дырэктарка аб'яднання інвестараў Angels Band

Валянцін Стэфановіч, сябра Рады "Вясны"

Алесь Бяляцкі, кіраўнік "Вясны"

Сяргей Сыс, праваабаронца "Вясны" і журналіст

Алена Лапцёнак, праваабаронца "Вясны"

Андрэй Палуда, праваабаронца "Вясны"

Яўгенія Бабаева, праваабаронца

Віктар Сазонаў, праваабаронца "Вясны"

Марына Статкевіч, былая сябра "Вясны"

Мікола Шарах, кіраўнік ячэйкі свабоднага прафсаюза з Полацка

Сяргей Мацкевіч, цэнтр "Супольнасць"

Відавочна, што матывам іх пераследу ёсць праваабарончая і грамадская дзейнасць: прасоўванне міжнародных стандартаў правоў чалавека і дэмакратычных каштоўнасцяў, дзеянні ў абарону права на жыццё, свабоду слова, мірных сходаў і асацыяцыі, права на справядлівы суд і свабоду ад катаванняў", — гаворыцца ў заяве праваабаронцаў.

Яны адзначаюць, што пераслед грамадзянскай супольнасці ў Беларусі са жніўня 2020 года набыў беспрэцэдэнтны маштаб. 

"На дзень падпісання заявы ў Беларусі прызнаныя палітвязнямі больш за 500 чалавек, прынамсі 1500 чалавек знаходзяцца ў турмах і тысячы людзей — пад следствам па палітычна матываваных абвінавачваннях. Цягам году, ад жніўня 2020 года, амаль 40 000 чалавек былі незаконна затрыманыя і пацярпелі ад катаванняў. Галоўныя незалежныя СМІ заблакаваныя", — апісваюць праваабаронцы сітуацыю ў краіне.

На іх думку, рэпрэсіі такога маштабу скіраваныя на знішчэнне ўсялякіх праяваў грамадскай актыўнасці ў Беларусі. Яны згадваюць словы кіраўніка МЗС Уладзіміра Макея пра перспектыву знішчэння грамадзянскай супольнасці у выпадку ўзмацнення заходніх санкцый.

Праваабаронцы патрабуюць неадкладна вызваліць згаданых палітвязняў і спыніць іх крымінальны пераслед, спыніць рэпрэсіі і вызваліць усіх палітычных зняволеных.

Пад заявай падпісаліся праваабарончы цэнтр "Вясна" (зачынены ўладамі), РПГА "Беларускі Хельсінкскі камітэт", Беларускі ПЭН-цэнтр, Беларускі дом правоў чалавека імя Барыса Звозскава, Беларускі дакументацыйны цэнтр, РГА "Прававая ініцыятыва”, кансультацыйны цэнтр па актуальных міжнародных практыках і іх імплементацыі ў праве "Х'юман Канстанта", ініцыятыўнай група "Ідэнтычнасць і права", Беларуская асацыяцыя журналістаў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі