Жыхары Мазыра суткі былі без цяпла і гарачай вады

Значная частка жыхароў Мазыра суткі была без цяпла і гарачай вады. Наступствы аварыі трубаправода цеплавой магістралі на тэрыторыі ЦЭЦ ліквідавалі толькі ўначы.

Аварыя на цеплавой сетцы здарылася яшчэ раніцай у чацвер. Мясцовым жыхарам абяцалі, што яе наступствы аператыўна ліквідуюць. Аднак аднаўленчыя працы зацягнуліся і тэрміны іх заканчэння неаднаразова пераносіліся. Энергетыкі спасылаліся на "складанасць мантажу", яны замянілі два "дэфектныя ўчасткі" трубаправода, і цеплатраса "была ўключана ў працу" толькі ў 03:30 у пятніцу. Пасля гэтага "цяпло і гарачая вада паступова сталі вяртацца ў дамы мазыран", піша раённая газета. Аднак і раніцай некаторыя гараджане наракаюць, што цяпла ў кватэрах яшчэ няма. На Мазырскай ЦЭЦ тлумачаць, што "чым далей спажыўцы знаходзяцца ад сеткавай наноснай станцыі..., тым даўжэй будзе ісці цяпло".

Што стала прычынай пашкоджання трубаправода, не ўдакладняецца. Падобныя аварыі адбываюцца па ўсёй Беларусі — інфраструктура патрабуе абнаўлення.