Міжнародную абарону ў Польшчы атрымалі больш за 8100 беларусаў

Польскі ўрад  захоўвае падыход максімальнага садзейнічання беларускай грамадзянскай супольнасці. Пра гэта было заяўлена падчас сустрэчы намеснік кіраўніцы Аб'яднанага пераходнага кабінета (АПК) Паўла Латушкі з дырэктаркай консульскага дэпартамента МЗС Польшчы, перадае прэс-служба АПК.

Прадстаўніца МЗС паведаміла, што ў чэрвені ў Польшчы пачнуць працу над новым візавым законам, а ў жніўні ён будзе апублікаваны на партале заканадаўчых актаў. Пасля гэтага будзе магчымасць уносіць у яго прапановы ў рамках грамадскай дыскусіі.

Беларусам, якім пагражае затрыманне, арышт ці ўзяцце пад варту, працягнуць выдаваць гуманітарныя візы, каб яны маглі тэрмінова пакінуць краіну. Выдавацца такія візы па-ранейшаму будуць толькі адзін раз.

На сёння ў Польшчы, па словах прадстаўніцы МЗС, міжнародную абарону атрымалі больш за 8100 грамадзян Беларусі.

"Дырэктар консульскага дэпартамента запэўніла, што калі ў грамадзян Беларусі нешта здарыцца з дакументамі аб статусе міжнароднай абароны ў якой-небудзь трэцяй краіне, то яны маюць права звярнуцца да польскага консула для вяртання ў Польшчу і аднаўлення дакументаў. Што да іншай консульскай дапамогі, то тут ёсць пэўныя цяжкасці, але МЗС гатовы разглядаць індывідуальныя выпадкі", — каментуе Латушка.

Што датычыць праграмы Poland Business Harbour, то праблемы, якія ўзніклі ў выніку яе закрыцця, будуць абмяркоўвацца пасля завяршэння праверкі Вышэйшай кантрольнай палатай у МЗС Польшчы з удзелам двух міністэрстваў — рэгіянальнай палітыкі і сям'і. "Пытанне ўзята пад увагу, і мы будзем прасоўваць яго далей", — кажа Латушка.

У МЗС Польшчы таксама пракаментавалі чэргі на атрыманне візы ў візавых цэнтрах. Праблемы патлумачылі тым, што рэжым Лукашэнкі выслаў вялікую колькасць польскіх консулаў. На гэта накладаецца і сезон адпачынкаў, калі многія людзі імкнуцца атрымаць візы.