У Гомелі знайшлі мёртвым намесніка дырэктара прыватнай рэкламнай тэлекампаніі
Андрэй Віннікаў загінуў, паведамляюць пошукавікі / Поисково-спасательный Отряд "Симуран"
У Гомелі знайшлі мёртвым Андрэя Віннікава — намесніка дырэктара прыватнай рэкламнай кампаніі "ФілТВ". Пра гэта паведамілі ў пошукава-выратавальным атрадзе "Сімуран".
Віннікаў знік 1 красавіка. Паведамлялася, што ў той дзень ён выйшаў з дому і больш не вярнуўся. Раней, у канцы сакавіка, быў затрыманы дырэктар і заснавальнік "ФілТВ", вядомы гомельскі бізнесовец Віталь Філінскі. Яго судзілі за "распаўсюд экстрэмісцкіх матэрыялаў", далі 15 сутак арышту. Але пасля заканчэння гэтага тэрміна на волю ён так і не выйшаў. Быў яшчэ адзін суд, які пакінуў яго ў зняволенні яшчэ на 15 сутак.
"ФілТВ" — гэта адзінае ў Гомельскай вобласці рэкламнае агенцтва поўнага цыкла. Яно вядзе праект ад распрацоўкі рэкламнай ідэі да яе ўвасаблення і размяшчэння на ТБ-каналах. Кампанія паспяхова працавала з 1996 года, выконвала ў тым ліку дзяржзаказы. Напрыклад, здымала фільм для Савета Рэспублікі Нацыянальнага сходу.
