20:42 Калдун выступіць з беларускамі з балету Кіркорава

Пакуль Калдун адпачывае на радзіме пасля часткі прома-туру, мы вырашылі спытаць яго, дзе ён ужо быў і як яго ўспрымалі:

“Мы наведалі 9 краінаў – гэта Ірландыя, Гішпанія, Грэцыя, Кіпр, Літва, Украіна і ўсе краіны былой Югаславіі. Мы пазнаёміліся з прадстаўнікамі ўсіх краінаў, якія наведалі. Канешне ж, калі такога ўжо выбралі. Напрыклад, у Гішпаніі я патрапіў толькі на чвэрцьфінал, яны даволі позна выбралі свайго ўдзельніка.

Увогуле, мне вельмі падабаецца так ездзіць, хаця б дзеля таго, каб паглядзець на іншыя краіны. Я не думаю, што на гэтым этапе ўдзельнікі паказваюць тое, што будуць паказваць непасрэдна на конкурсе. Таму папярэдніх вынікаў я рабіць не магу. Каб нічога потым не сурочыць.

Магу дадаць, што ўсе ўдзельнікі даволі добразычлівыя, нават дапамагаюць адзін аднаму. Справа ў тым, што я не адчуваю ніякай канкурэнцыі, хутчэй наадварот, існуе адчуванне агульнай працы і агульнага свята”.

Вядома ж мы не маглі не спытаць у Змітра пра яго шоў-праграму:

“Шоў-праграма яшчэ не гатовая. Падрыхтоўка канчатковага нумару запланаваная на 23 красавіка, калі я паеду ў Маскву, дзе ўжо буду займацца з харэографамі. Магу сказаць, што тая аснова, якая ўжо зараз існуе на прома-туры, застанецца, проста ў нумар дададуцца нейкія таямнічыя фішкі”.

На жаль, што гэта за фішкі, Зміцер адмовіўся адказваць, але дадаў, што дзве дзяўчыны, якія зараз выступаюць з ім, таксама застануцца ў фінальным шоў.

Дарэчы, завуць іх Наташа і Ілона, яны беларускі, якія скончылі Беларускі дзяржаўны універсітэт культуры і ўжо некалькі год працуюць у балеце Кіркорава. У канцы размовы мы спыталі Калдуна, як ён ставіцца да сваёй чацвёртай пазіцыі на паўфінальным выступленні:

“Чым бліжэй да канца, тым лепш, але мой нумар чатыры. На мой погляд, парадак выступлення ніяк не ўплывае на вынікі. Гэта проста яшчэ адна прычына апраўдацца, калі ты аблажаўся. Маўляў, у нас было лепшае выступленне, але мы выйшлі на сцэну першымі і на нас забыліся.

Калі я, напрыклад, аблажаюся, я ні ў якім разе не буду абвінавачваць сваю пазіцыю на выступленні, а буду лічыць вінаватым выключна сябе”.

Дадам, што праз тыдзень Калдун працягне прома-тур у якім запланаваны Польшча і Румынія. І нагадаю, конкурс еўрапейскай песні “Еўрабачанне-2007” адбудзецца з 10 па 12 траўня ў Хельсінкі і ў гэтым годзе ў ім возьме ўдзел рэкордная колькасць краін — 42, у тым ліку ўпершыню заяўленыя Чэхія і Грузія.