Беларуская футбалістка, якая гуляе ў Даніі, папрасіла не выклікаць яе ў зборную
![Анастасія Пабягайла](/sites/default/files/styles/gallery_main/public/2023-11/apa.jpg.webp?itok=JKpjViZK)
Анастасія Пабягайла / instagram.com/pobi_04/
Беларуская футбалістка Анастасія Пабягайла, якая гуляе ў Даніі за "Фартуну", папрасіла не выклікаць яе ў зборную РБ. І яе не было ў складзе каманды, якая ў кастрычніку праводзіла матчы Лігі нацый. Вядома, што праблем са здароўем у спартсменкі не было. Галоўны трэнер зборнай Юрый Малееў, каментуючы сітуацыю, згадаў яе ліст кіраўніцтву федэрацыі. Нібыта Пабягайла спаслалася на занятасць у чэмпіянаце Даніі.
Аднак паводле інфармацыі "Трыбуны" просьба футбалісткі была звязаная не з фізічнай стомленасцю, а з маральным фонам у нацыянальнай камандзе. Галоўны трэнер часта крыкам выказвае прэтэнзіі падапечным у зборнай. Анастасія Пабягайла, чый характар таксама нельга назваць простым, не стала мірыцца з прэтэнзіямі Малеева. І гэта не першы такі канфлікт у зборнай, але ў большасці выпадкаў гісторыі заставаліся за зачыненымі дзвярыма.
Пасля атрымання ліста ніхто не спрабаваў выйсці на сувязь з футбалісткай, каб неяк уладзіць канфлікт — ні з трэнерскага штабу зборнай, ні з кіраўніцтва федэрацыі. Як вядома, старшынём камітэту па жаночым футболе АБФФ зʼяўляецца Уладзімір Базанаў, экс-кіраўнік федэрацыі.
Анастасіі Пабягайла 19 гадоў. Яна выступала за "Мінск", а з 2023 года гуляе ў Даніі. Пабягайла лічыцца найлепшай беларускай легіянеркай у Еўропе.
![Беларуская футбалістка, якая гуляе ў Даніі, папрасіла не выклікаць яе ў зборную](/sites/default/files/styles/default_image_paragraph/public/paragraphs/image/04_24.jpg.webp?itok=9dUI2Eoo)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.