Беларускі атрымалі жаночую прэмію імя Ганны Кляйн
Дар'я Афанасьева, Ірына Альхоўка і Юлія Міцкевіч / boell.de
Беларускі атрымалі жаночую прэмію імя Ганны Кляйн. Яе прысуджае фонд Генрыха Бёля ў Германіі за барацьбу за гендарныя правы. Узнагародай уганаравалі праваабаронцу і абаронцу правоў жанчын Ірыну Альхоўка, феміністку-блогерку Дар'ю Афанасьеву і фем-актывістку, палітыка Юлію Міцкевіч.
"Дар'я, Ірына і Юлія ўвасабляюць асаблівую ролю жанчын у пратэстах з нагоды прэзідэнцкіх выбараў у Беларусі 2020 года, — піша журы прэміі. — Дар'я, Ірына і Юлія таксама былі ў першых шэрагах гэтых пратэстаў і змаглі пазбегнуць рэпрэсій і гвалту, якія пачаліся пасля пратэстаў, толькі дзякуючы вымушанай эміграцыі".
Адзначаецца, што ўручэнне прэміі мае на мэце праявіць салідарнасць з беларускамі і беларусамі, якія змагаюцца за свабоду ў Беларусі і трапілі пад пераслед. Таксама журы хоча "выказаць павагу за працяг грамадскай дзейнасці траіх лаўрэатак на карысць свабоднай і гендарна роўнай Беларусі ў дэмакратычнай Еўропе".
