Беларускіх сілавікоў чакае павышэнне пенсійнага ўзросту
Беларускіх сілавікоў чакае павышэнне пенсійнага ўзросту. Пры гэтым будзе улічвацца асаблівасць вайсковай службы. Пра гэта заявіў дзяржаўны сакратар Савета бяспекі Станіслаў Зась.
Як паведамляла Еўрарадыё, у чацвер з удзелам кіраўніка дзяржавы прайшла нарада, прысвечаная пытанням развіцця пенсійнай сістэіы. Аляксандру Лукашэнку прапанавалі на разгляд тры варыянты зменаў, якія могуць пачацца ўжо з 1 студзеня 2017 года. У сваёй прамове ён згадваў і сілавікоў, якія выходзяць на пенсію ў 45 гадоў.
Лукашэнка — пра пенсіі: У 60 гадоў мужык — гэта конь, на якім можна яшчэ араць
Зась адзначыў, што пры павышэнні пенсійнага ўзросту для сілавікоў, будзе звяртацца ўвага на тыя спецыяльнасці, дзе людзі выконваюць задачы з рызыкай для жыцця. "Маюцца на ўвазе спецпадраздзяленні, ратавальнікі і іншыя спецыяльнасці. Характар іх дзейнасці будзе ўлічвацца пры прыняцці рашэння", — цытуе словы дзяржсакратара Савета бяспекі БЕЛТА.
Зась адзначыў, што ўлады пастараюцца не пакрыўдзіць людзей, якія "ўжо зарабілі пенсію і цяпер знаходзяцца ў чаканні гэтага ўзросту". Пытанне яшчэ будзе "дэталёва прапрацоўвацца". Якім будзе канчатковы варыянт павышэння пенсійнага ўзросту для прадстаўнікоў сілавых структур, пакуль сказаць немагчыма. Зась падкрэсліў, што Лукашэнка спадзяецца на разуменне людзей у пагонах.
Канчатковае рашэнне па пытаннях развіцця пенсійнай сістэмы ў Беларусі будзе прынятае на наступнай нарадзе. Яна мусіць адбыцца "ў хуткім часе". Улады абяцаюць, што абавязкова абмяркуюць пытанне з грамадствам.
