Ці чакае Лукашэнку суд за дэпартацыю ўкраінскіх дзяцей у Беларусь?

Што азначае рэзалюцыя ПАСЕ і ці чакае кіраўніка Беларусі ордэр на арышт?

— Сама рэзалюцыя ПАСЕ не з’яўляецца тым, што робіць Лукашэнку злачынцам і на яго выдадзены арышт, але патрэбна разумець, што палітычна гэта дастаткова моцная заява, — адказвае наш суразмоўца. — На міжнародным узроўні прызналі, што Лукашэнка датычны да жудасных рашэнняў і такіх дзеянняў як, умоўна кажучы, генацыд. Інфармацыя пра факты па прымусовым вывазе дзяцей была пачутая, прынятая і дастаткова моцна артыкуляваная, знайшоўшы адлюстраванне ў рэзалюцыі.

Але мы, у камандзе НАУ, лічым, што ў першую чаргу ён вінны ў перамяшчэнні і дэпартацыі дзяцей на тэрыторыю Беларусі. Тое, што гэта акт генацыда — ужо вызначыла ПАСЕ. Рашэнне аб выдачы ордэраў прымае не ПАСЕ, не іншая структура, а Міжнародны крымінальны суд і пракурор.      

— Ці можна разлічваць на тое, што на падставе такіх заяў і рэзалюцый Лукашэнку калі-небудзь усё ж чакае суд за яго злачынствы?

— У першую чаргу патрэбна разумець: палітычная рэзалюцыя — толькі першы крок. За ім будуць ісці наступныя крокі, якія могуць прывесці да таго, што Лукашэнку будзе выдадзены ордэр за парушэнне міжнароднага права. Тое, што ён робіць — гэта ваеннае злачынства.

Але рэчаіснасць такая, што наступныя крокі таксама павінны быць прынятыя на міжнародным узроўні. Я лічу, што тых фактаў, якія збірае ў тым ліку і наша каманда, хопіць для таго, каб ордэр на арышт быў выдадзены. Шанцы на гэта дастаткова высокія.