Дапамажыце, пакуль не загінулі ўсе: у Зімбабвэ скардзяцца на беларускую кампанію

15/04/2023 - 11:59

Забруджаная рака Мутарэ / twitter.com/PacheduZW

Забруджаная рака Мутарэ / twitter.com/PacheduZW

Беларусь спрыяе дэградацыі зямель у Мутасе, уключаючы забруджванне ракі Мутарэ, сцвярджае група зімбабвійскіх актывістаў Team Pachedu.

Яны паведамляюць, што кампанія Zim Goldfields (Беларусь), якая сумесна з кітайскай Xu ZhongJin Investments займаецца ў Зімбабвэ здабычай карысных выкапняў, падвяргае рызыцы жыцці мясцовых жыхароў.

У звароце аднаго з мясцовых да зімбабвійскіх чыноўнікаў, які прымацоўвае Team Pachedu, гаворыцца:

— Яны вядуць свае працы ўсяго за 100 метраў ад майго дома, і жыццё для нас стала цяжкім з таго часу, як яны пачалі свае працы ў лютым 2022 года. Дарога да маёй сядзібы закрытая, і цяпер нам даводзіцца ісці яшчэ 6 кіламетраў, каб трапіць дадому…

Адбываецца маштабная дэградацыя навакольнага асяроддзя, і мы не ўпэўненыя, што адпаведныя органы не ведаюць пра тое, што адбываецца. Кітайская горназдабыўная кампанія зрывае гару, але нічога не зроблена, каб абараніць жыцці ўсіх сем'яў ля падножжа гары. Выбуховыя работы вядуцца ў кожную хвіліну, і нашы жыцці знаходзяцца пад пагрозай. У адзін момант абломкі ад выбуховых работ закранулі і разбурылі частку даху дома аднаго з жыхароў…

Яны выкарыстоўваюць хімікаты, якія ператвараюць усю зямлю на нашых хатніх пляцоўках у белы попел, калі яны ўжываюць хімікаты. Падчас нанясення хімікатаў нельга нічога рабіць на вуліцы, таму што ўсе задыхаецца. Гэта працягваецца некалькі дзён, і мы не ведаем, што з намі будзе. Мы нават не ведаем, якія хімікаты яны выкарыстоўваюць. Шумавое забруджванне 24 гадзіны ў суткі, таму што яны працуюць 24 гадзіны ў суткі з панядзелка па нядзелю.

... спадзяюся, што вы дапаможаце вырашыць гэтую сітуацыю, пакуль не загінулі ўсе людзі ў Прэм'еры і вакол.

У 2022 годзе беларуская кампанія Zim Goldfields разам з кітайскім партэрам трапіла ў скандал, паколькі фірма нелегальна здабывала золата на тэрыторыі турыстычнага комплексу. Скаргі ўладальнікаў ігнараваліся.

Актывісты таксама нагадваюць, што Zim Goldfields датычная да трагедыі з пахаваннем жыўцом шахцёраў.

У 2021 годзе беларускія журналісты-расследавальнікі даведаліся, што Zim Goldfields заснавана ў 2018. Праз пракладкі долі ў кампаніі маюць Сяргей Шэйман, сын набліжанага да Лукашэнкі Віктара Шэймана і бізнэсовец Аляксандр Зінгман.