Дзе і як беларусам адзначыць Дзень Волі? Вялікая афіша

22/03/2024 - 18:24

Дзе будуць святкаваць Дзень Волі? / t.me/motolkohelp

25 сакавіка беларусы адзначаюць Дзень Волі. Менавіта ў гэты дзень у 1918 годзе была абвешчаная Беларуская Народная Рэспубліка (БНР) — першая незалежная беларуская дзяржава.
Еўрарадыё паглядзела, дзе і як збіраюцца адзначаць 106 гадавіну з дня абвяшчэння БНР.

Беларусь

Адзначыць Дзень Волі ў Беларусі наўрад ці ўдасца: сілавікі пераследуюць не толькі за нацыянальныя сімвалы, але і любыя спробы правесці "непажаданае" мерапрыемства.

Але выйсце ёсць. Каманда БНР-100 арганізоўвае вялікую анлайн-трансляцыю на YouTube-канале "Годна". Пачатак — а 19:00 паводле мінскага часу.

Где и как белорусам отметить День Воли? Большая афиша

Анлайн-святкаванне Дня Волі / Bnr106.info

Мерапрыемства будзе складацца з двух блокаў: музычнага і пазнавальнага. На канцэрце выступяць гурты J:mors, Naviband, Šuma, Nochy, Dzieciuki і Volski. Вядоўцамі выступяць прадстаўнік каманды "Годна", TikTok-блогерка Ліза Ветрава і тэлевядоўца Дзяніс Дудзінскі.

Варшава

Асноўныя мерапрыемствы тут пройдуць 24 сакавіка — марш і мітынг-канцэрт, у ім возьмуць удзел Піт Паўлаў, гурт Dzieciuki, The Superbullz, Atesta, Belarusian Truestory і іншыя. Пачатак у 14:00 на плошчы Трох Крыжоў, фінал адбудзецца на Замкавай плошчы, там жа пройдзе і канцэрт.

Дарэчы, BYSOL абвясціў збор у падтрымку арганізатараў акцыі.

Акрамя гэтага, 23 сакавіка ў 13:00 па адрасе Kryniczna 6 з лекцыяй пра "Гістарычнае значэнне і ролю БНР" выступіць Зянон Пазняк.

24 і 26 сакавіка "Хор вольных беларусаў" сумесна з лялечным тэатрам "Батлейка+" прадставяць праграму "У пошуках краіны Жаданай". Арганізатары запрашаюць усіх па адрасе Puławska 114.

Кракаў

Беларуская дыяспара пачне тут сваю праграму ў суботу адкрыццё выставы мастачкі Наталлі Борд.

У Дзень Волі беларусы збяруцца на Плошчы вялікай арміі Напалеона, адкуль пачнецца марш да цэнтральнай плошчы, а крыху пазней у Chicago Bar выступіць гурт Teleport.

27 сакавіка беларусаў чакае гістарычная лекцыя пра стварэнне БНР, а 30 сакавіка – падарожжа па беларускім Кракаве.

Гданьск

Беларусы польскага "Труймяста" пачнуць адзначаць Дзень Волі ў нядзелю ўскладаннем кветак дзеячам БНР на Гарнізонных могілках.

Далей у 11:30 усіх жадаючых запрашаюць далучыцца да маршу, які пройдзе па маршруце ад фантана Нептуна да Еўрапейскага цэнтра салідарнасці, дзе ў 15:30 адбудуцца дэбаты пад назвай "Спадчына БНР — у пошуках нацыянальнай ідэнтычнасці". У іх возьмуць удзел рэдактар Еўрарадыё Зміцер Лукашук, а таксама Алена Глагоўская, Рыгор Астапеня і Наста Ільіна.

Завершыцца праграма 25 сакавіка прэзентацыяй новай кнігі пра беларусаў "Jakby w cieniu i ciszy" ("Нібы ў ценю і цішыні") Тадэвуша Сухарскага ў бібліятэцы ЕЦС.

Беласток

24 сакавіка пройдзе мітынг-канцэрт пры ўдзеле Кацярыны Ваданосавай, Kurwadziki і Ігара Палынскага. Таксама свой выступ анансаваў гістарычны клуб рэканструкцыі Invictus 1863. Мерапрыемства адбудзецца па адрасе Rynek Kosciuszki 10.

А 25 сакавіка ў парку Планты адбудзецца сімвалічны забег, прымеркаваны да Дня Волі.

У гэты ж дзень у канцэртнай зале Падляшскай оперы і філармоніі пройдзе святочны канцэрт пад кіраўніцтвам Паўла Котлі.

Вільня

24 сакавіка пройдзе Вольны бчб-аўтапрабег Вільня-Каўнас-Вільня. Збор аўтамабілістаў прызначаны на 13.30 на плошчы Кудзіркі. Да 18 гадзін плануецца вяртанне ў Вільню.

У панядзелак 25 сакавіка пройдзе мітынг на Лукішскай плошчы, арганізатары прапануюць беларусам Вільні выканаць гімн БНР разам з ансамблем "Гоман".

Там жа адбудзецца фотавыстава аб беларускім батальёне ў літоўскай арміі 1918-1923 гадоў.
Пасля гэтага намячаецца святочны марш да Рэфармісцкай царквы, каля якой у 19:15 з канцэртам выступіць "Вольны хор".

Тбілісі

У грузінскай сталіцы ў нядзелю на 17:00 запланаваны канцэрт у Dro Bar. Арганізатары абяцаюць квіз, жывую музыку і конкурсы.

На гэтым праграма не скончыцца, 25 сакавіка беларуская дыяспара Тбілісі правядзе акцыю ля будынка парламента. Пачатак — у 19:30.

Батумі

Беларусам Батумі 24 сакавіка прапануюць далучыцца да святочнага кірмашу на плошчы Еўропы. Можна будзе набыць нацыянальную сімволіку, вырабы ад рамеснікаў і сувеніры.

У 18:30 пройдзе мітынг ад вуліцы Мелікішвілі да плошчы Еўропы, дзе пазней пройдзе канцэрт з удзелам "Спеўнага Сходу".

Прага

На Старамейскай плошчы Прагі 24 сакавіка адбудзецца афіцыйнае адкрыццё памятнага знака Францыска Скарыны. Пасля гэтага адбудзецца марш да помніка ахвярам камунізму, дзе прагучыць гімн БНР, а ўсе ахвотныя змогуць выступіць у фармаце адкрытага мікрафона.

Берлін

Беларусы Берліна сёлета збіраюцца на падворку Haus der Statistik. Сустрэча пройдзе ў нядзелю ў 17:00.

“Ежу прыносьце с сабой: для сябе і для брата з сястрой. Бар будзе, праграма будзе, вогнішча будзе, будуць і танцы. Апранайцеся цёпла, хоць вясна ужо блізка. Пахне чабор!” — пішуць арганізатары.