Энергетыкі назвалі прычыну адключэння электрычнасці ў Сцяпянцы

Па стане на 14:15 энергетыкі аднавілі электразабеспячэнне большай часткі спажыўцоў сталічнага мікрараёна Сцяпянка (вуліцы Анаева, Ваўпшасава, Геалагічная, Карвата, Солтыса і завулак Солтыса).

Прычынай адключэння электраэнергіі стала механічнае пашкоджанне дзвюх кабельных ліній. Гэта адбылося падчас земляных работ, якія праводзіла адна з арганізацый, не атрымаўшы на іх дазвол.

У аднаўленчых работах задзейнічаныя тры аператыўна-выязныя брыгады ў колькасці дзевяці чалавек.

Па стане на 18:16 энергетыкі заявілі пра поўнае аднаўленне падачы электраэнергіі.

Як расказвала Еўрарадыё, электрычнасць у Сцяпянцы знікла ў 12:15.

За апошнія тыдні на электрасетках адбылося сем буйных аварый.