Фактчэкінг. Дасягненні Беларусі, паказаныя па ТБ пасля слоў Лукашэнкі

Трансляцыя паслання Аляксандра Лукашэнкі па беларускім ТБ скончылася ролікам "Мы зрабілі гэта разам". Яго аўтары паскрэблі па міжнародных рэйтынгах і сабралі ўсе дасягненні Беларусі. І ведаеце што? Калі верыць беларускаму тэлебачанню, наша краіна не так і дрэнна выглядае на фоне іншых! Мы жывем амаль у самай лепшай краіне, і амаль усе астатнія краіны нам зайздросцяць!

Але гэта да таго, як Еўрарадыё вырашыла правесці фактчэкінг гэтых нашых выдатных дасягненняў.

10 месца ў свеце па індэксе бяспекі

Выглядае вельмі крута! Але давайце разбярэмся. Індэкс бяспекі распрацаваны папулярным сэрвісам Numbeo і заснаваны на апытаннях карыстальнікаў сайта. Беларусь на 15 месцы сярод 115 краін (10-я пазіцыя ў краіны была, але ў мінулым годзе). Пры гэтым горад Мінск па бяспецы на 36 месцы ў свеце.

На "Індэкс бяспекі" спасылаецца і кіраўнік дзяржавы ў пасланні. Ён таксама памылкова кажа аб 10 месцы. Ды і на сайце МЗС таксама ўжо можна памяняць інфу.

Па даступнасці медыцынскай дапамогі Беларусь уваходзіць у топ-3 сусветных лідараў

Рэйтынг краін па эфектыўнасці сістэм аховы здароўя складзены аналітыкамі агенцтва Bloomberg на падставе даных СААЗ, ААН і Сусветнага банка. Па-першае, у гэтым рэйтынгу Беларусь на 48 месцы ў свеце (гэта сярод 55 краін). Адкуль тады вось гэта "уваходзіць у топ-3"?

Адзін з трох паказчыкаў рэйтынгу — "Кошт медыцынскіх паслуг у пераліку на душу насельніцтва (у доларах)". Гэта мы і трактуем, як "даступнасць меддапамогі". Але нават па гэтым паказчыку Беларусь на 9 месцы (была ў топ-3 ў рэйтынгу 2014 года). І, дарэчы, у сусветным рэйтынгу Сусветнай арганізацыі аховы здароўя Беларусь на 72 месцы. Гэта і ёсць наш рэальны рэйтынг.

Беларусь цалкам забяспечвае сябе харчаваннем

"Па шэрагу тавараў (мяса, сметанковае масла, сыр, яйкі, мука) попыт пакупнікоў практычна цалкам задавальняецца за кошт прадукцыі беларускіх таваравытворцаў" — цытуем сайт Белстата. У 2017 годзе краіна экспартавала харчовых тавараў на 3,6 млрд. долараў. А імпартавала — на 3,1 млрд. У плюсе на $462 млн.

Пры гэтым 54,7% круп, 28% гародніны, 80,3% алею і 91,2% садавіны, якія спажываюць беларусы — імпартныя. Але самі вырасціць бананы ці рыс мы і не можам.

37 месца ў рэйтынгу "Вядзенне бізнесу 2017"

У рэйтынгу Сусветнага банка Doing Business Беларусь таксама ўжо апусцілася на адну пазіцыю (38). Пры гэтым па падаткаабкладанні мы... на 96 пазіцыі.

Беларусь лідзіруе ў глабальным рэйтынгу развіцця інфармацыйна-камунікацыйных тэхналогій на постсавецкай прасторы

Гэтая фармулёўка — "на постсавецкай прасторы" — адразу насцярожвае. У сусветным рэйтынгу Беларусь на 32-м месцы. А сярод краін постсавецкай прасторы — на першым, але гэта калі не лічыць постсавецкай прасторай Эстонію (яна на 17 месцы). Ці то з гісторыяй у аўтараў фільма дрэнна, ці то з геаграфіяй, ці то з падлікамі.

Аб'ём замежных інвестыцый (2016 г.) — 8.5 млрд долараў

А ў 2017 годзе — 9,7 млрд. долараў. Нават дзіўна, што мы карыстаемся састарэлымі дадзенымі — бо карцінка палепшылася! Праўда, 7% замежных інвестыцый — кіпрскія, а брытанскіх і таго больш — 26%. Хто гэтыя кіпрыёты і брытанцы, якія інвестуюць у Беларусь? Ці не нашы з вамі былыя суграмадзяне, якія абралі больш ціхія гавані для сваіх бізнесаў?

І яшчэ праўда тое, што з 2014 года замежныя інвестыцыі ўпалі на траціну.

Кожную гадзіну ў Беларусі нараджаецца 14 дзяцей

У 2017 годзе ў краіне нарадзілася 102 556 дзяцей або ў сярэднім 11,7 дзіцяці ў гадзіну. 14 дзяцей у гадзіну нараджалася ў 2015 годзе. Але ўжо два гады нараджальнасць зніжаецца.