Фрыдман: Званок Макрона — апошняя спроба папярэдзіць Лукашэнку
26 лютага Аляксандру Лукашэнку пазваніў прэзідэнт Францыі Эмануэль Макрон. Прапагандыстскія каналы тут жа адрапартавалі, што размова цягнулася амаль паўтары гадзіны і тычылася украінска-расійскага канфлікта.
Гісторык Аляксандр Фрыдман, які прааналізаваў афіцыйнае паведамленне Елісейскага паладу, мяркуе, што размова была непрыемнай для Лукашэнкі, у ёй выкарыстоўваліся жорткія і недыпламатычныя фармулёўкі, Беларусь называлася васалам Расіі. Фрыдман мяркуе, што званок Макрона — гэта апошняя спроба папярэдзіць Лукашэнку, але без асаблівай надзеі, што нешта з гэтага атрымаецца. Маўляў, на Захадзе ўжо нават не спадзяюцца, што можна яшчэ нешта зрабіць у беларускім кірунку.
"Сёння роля Беларусі ўспрымаецца як саўдзел у вайне, пасобніцтва агрэсару, гэта адзіная краіна, якая на гэты момант цалкам падтрымлівае Расію. Таму, мне падаецца, на Захадзе ўжо страцілі ўяўленне, што яшчэ можна нешта зрабіць на беларускім кірунку. А можа ўсё стане зразумела і раней, калі заўтра, 28 лютага, як сцвярджаюць некаторыя крыніцы, беларускія войскі пяройдуць мяжу і пачнуць адкрыта ўдзельнічаць у вайне. І пытанне пра нейкую суб’ектнасць Лукашэнкі і незалежнасць Беларусі будзе канчаткова закрытае", — мяркуе Фрыдман.
27 лютага з'явілася інфармацыя, што Аляксандр Лукашэнка афіцыйна збіраецца ўступіць у вайну Расіі з Украінай. У цэнтры абаронных стратэгій кажуць, што калі Лукашэнка вырашыцца на падобны крок, то супраць укріанскіх сілаў абароны будзе задзейнічаная ўся беларуская армія цалкам.
У нядзелю па ўсёй Беларусі праходзяць антываенныя мітынгі. Свабодныя беларусы выступаюць супраць вайны, якую Расія развязала ў дачыненні да Украіны. Паведамляецца пра дзясяткі затрыманняў.
