Кавалеўскі: Захад выставіць новыя ўмовы рэжыму Лукашэнкі
Валерый Кавалеўскі / тэлеграм-канал Аб'яднанага пераходнага кабінета
Дырэктар Агенцтва еўраатлантычнага супрацоўніцтва Валерый Кавалеўскі на стрыме Еўрарадыё выказаў думку, што Захад будзе выстаўляць рэжыму Лукашэнку новыя ўмовы, але на сённяшні дзень многія з іх не надта актуальныя.
— Няма сумневу ў тым, што такія выбары [сумленныя] на сённяшні дзень немагчымыя ва ўмовах, калі тысячы людзей знаходзяцца ў турмах, калі палітычныя лідары не могуць браць удзел у выбарах і калі няма незалежных СМІ, якія б асвятлялі гэтыя выбары.
На сённяшні дзень няма базавых умоў. Але да гэтага можна прыйсці, я спадзяюся, што, калі будзе весціся гаворка пра свабодныя выбары, у Беларусі будзе дэмакратычная ўлада, здольная іх правесці.
Кавалеўскі кажа, што дэмакратычныя сілы спрабуюць пераканаць міжнародную супольнасць у тым, што дэмакратычная і незалежная Беларусь — у інтарэсах рэгіянальнай бяспекі.
— Бо мы пабачылі, што праз ігнараванне Беларусі рэжым Лукашэнкі стаў пагрозай міжнароднаму міру і бяспецы, і гэта абсалютна новы ўзровень за ўсе 30 гадоў яго кіравання.
