Макей: у размяшчэнні ў Беларусі расійскай вайсковай базы няма сэнсу

Як вядома, нядаўна міністр замежных спраў Расіі Сяргей Лаўроў назваў адмову Беларусі ад расійскай вайсковай базы "непрыемным эпізодам". Уладзімір Макей, каментуючы гэтыя словы, параіў удакладніць у Лаўрова, што ж ён меў на ўвазе. А ад сябе дадаў: "ніколі Беларусь не будзе прымаць прынцыповае рашэнне пад уплывам нейкіх знешніх сіл". Рашэнне калі і прымаецца, то пасля аналізу яго адпаведнасці нацыянальным інтарэсам.

Макей выказаўся і пра нармалізацыю дачыненняў Беларусі і ЗША. Ён паўтарыў словы, якія гучалі і з вуснаў Аляксандра Лукашэнкі: наша краіна не збіраецца сыходзіць на Захад, не будзе сябраваць з кімсьці на шкоду інтарэсам Расіі ці супраць Расіі. "Таму я не думаю, што палітычнае кіраўніцтва Расіі адчувае нейкую рэўнасць з-за таго, што Беларусь імкнецца нармалізаваць адносіны з ЗША, — кажа кіраўнік беларускага знешнепалітычнага ведамства. — ...Нікуды мы не збяжым з таго месца, дзе мы знаходзімся".

Размовы пра стварэнне ў Беларусі расійскай авіябазы працягваюцца з 2013 года. У Маскве неаднаразова выказвалі зацікаўленасць у ёй. Аднак у Мінску лічылі пытанне неактуальным. Лукашэнка гаварыў, што яму хутчэй патрэбны сучасныя расійскія самалёты, а не расійская авіябаза.