Мір ва Украіне без паразы Расіі — параза для Лукашэнкі? Меркаванне эксперта

На думку Рыгора Ніжніка, сітуацыя, калі лідары дэмсілаў размаўляюць пра Беларусь у Варшаве, што выклікае добрыя водгукі ў Бруселе, для іх з’яўляецца камфортнай. І яны б яе не шмат у чым хацелі мяняць.

— Тое самае тычыцца Лукашэнкі, — працягвае эксперт. — Параза Масквы прывядзе да паразы яго самога — Лукашэнка не працягне і двух сутак пасля таго, як рэжым Пуціна абрынецца. Сітуацыя, калі падчас ваенных дзеяў у Пуціна няма часу на Беларусь, Лукашенку цалкам задавальняе. Роля старшыні, які робіць у Беларусі ўсё тое, што ад яго патрабуюць [у Маскве], яму падабаецца. Але ж калі рэжым Пуціна гіпатэтычна прайграе і падзе, з ім падзе і рэжым Лукашэнкі. Ён як кліент гэтага рэжыму без яго існаваць не зможа, бо падтрымкі ўнутры краіны няма.

Але калі Пуцін перамагае, тады навошта яму Лукашэнка? Лукашэнка для яго — проста чалавек, які займае месца. Калі Украіна вяртаецца ў лона Масквы, пра што марыць Пуцін, Беларусь адразу ідзе ў камплекце. План Пуціна — у аб’яднанні славянскіх краін, якія “адзін народ”. У гэтым ён бачыць сваю спадчыну. То-бок Лукашэнка ўжо не будзе патрэбны. Таму Лукашэнка проста выпадзе з вакна ці, хутчэй за ўсё, пераедзе куды яму трэба.