Міжнародны крымінальны суд у Гаазе выдаў ордэр на арышт Уладзіміра Пуціна

Міжнародны крымінальны суд у Гаазе (МКС) выдаў міжнародныя ордэры на арышт прэзідэнта Расіі Уладзіміра Пуціна, а таксама ўпаўнаважанай па правах дзіцяці Марыі Львовай-Бяловай.

У прэс-рэлізе МКС гаворыцца: "Сёння, 17 сакавіка 2023 года, другая палата дасудовага разбору Міжнароднага крымінальнага суда выдала ордэры на арышт дзвюх асоб у кантэксце сітуацыі ва Украіне: сп. Уладзіміра Уладзіміравіча Пуціна і сп-ні Марыі Аляксееўны Львовай-Бяловай".

МКС падазрае, што абое яны нясуць адказнасць за ваеннае злачынства — незаконную дэпартацыю насельніцтва і незаконны перавод насельніцтва з акупаваных раёнаў Украіны ў Расійскую Федэрацыю на шкоду ўкраінскім дзецям.

Еўрарадыё паведамляла ўжо, што МКС пачаў дзве крымінальныя справы аб ваенных злачынствах, звязаных з уварваннем Расіі ва Украіну. Расію абвінавацяць у выкраданні ўкраінскіх дзяцей і наўмысным нанясенні ўдараў па грамадзянскай інфраструктуры.

У сённяшнім паведамленні гаворыцца, што звычайна суд не раскрывае імёны асобаў, на якіх выдаюцца ордэры. Аднак гэтым разам вырашана назваць імёны ў інтарэсах правасуддзя і ў спадзяванні, што веданне грамадскасці пра гэтыя ордэры "можа спрыяць прадухіленню далейшага здзяйснення злачынстваў".