Пазняк просіць Лукашэнку спыніць рэпрэсіі
Рэпрэсіі ў Беларусі не спыняюцца / Еўрарадыё
Зянон Пазняк просіць Аляксандра Лукашэнку спыніць рэпрэсіі ў Беларусі. Пра гэта кіраўнік руху "Вольная Беларусь" сказаў у навагоднім відэазвароце, запісаным у ЗША.
Пазняк нагадаў, што раней звяртаўся да Лукашэнкі з просьбай выпусціць палітычных зняволеных.
"З'яўляецца фактам тое, што палітычныя зняволеныя выпускаюцца, — кажа Пазняк. — Больш ста беларускіх вязняў выпушчаны з турмаў [насамрэч па памілаванні вызвалена больш за 200 палітычных зняволеных]. Гэта вельмі добрыя дзеянні. І сёння, віншуючы ўсіх нас з Новым годам і звяртаючыся да Лукашэнкі, я хачу сказаць наступнае. Першы крок зроблены, павінен быць другі крок — трэба спыніць рэпрэсіі, трэба спыніць кідаць у турмы невінаватых людзей! Спыніцеся, выпусціце іх!.. Гэта мая просьба. Гэта паўплывае на ўсіх. Гэта будзе спрыяць добрым справам".
У Беларусі налічваецца больш за 1200 палітвязняў.
