Першую за два гады харчовую перадачу прынялі для палітвязня Уладзіміра Гундара

Палітвязень Уладзімір Гундар атрымаў прадуктовую перадачу ўпершыню за амаль два гады. Пра гэта паведамляе Радыё Свабода са сваіх крыніц са спасылкай на сваякоў палітзняволенага.

"Будзе яму крыху садавіны і гародніны, каб падмацавацца. Але пісаў, што даўно прызвычаіўся да турэмнай ежы", — паведаміла крыніца.

Апошнія паўтара года Гундара трымаюць на турэмным рэжыме ў Магілёве. Яго пазбавілі спатканняў і прадуктовых перадач, але невядома, з якой прычыны. Кантакт з палітвязнем магчымы толькі праз ліставанне і тэлефонныя званкі. Апошні ліст ад яго прыходзіў у сакавіку.

Крыніца кажа, што Гундар не скардзіцца на здароўе, але мае сумны настрой, бо не верыць у хуткія перамены.

Вядома, што ў зняволенні Уладзімір Гундар працягвае пісаць вершы і шмат чытае. Таксама яму дазволеныя прагулкі. У палітвязня няма адной нагі вышэй за калена, на прагулкі ён выходзіць на мыліцах.

64-гадовы краязнаўца з Баранавічаў Уладзімір Гундар — інвалід другой групы. У СІЗА ён часткова страціў слых на адно вуха, пазней слых аднавіўся, але вязню дагэтуль трэба прымаць лекі. У мужчыны павышаны ціск, за кратамі ён перанёс гіпертанічны крыз.

У 2022 годзе Гундара, ужо асуджанага на два гады за напад на міліцыянта, асудзілі яшчэ на 18 гадоў. Ён быў адным з фігурантаў "справы Аўтуховіча". У студзені 2023-га яму прысудзілі яшчэ два з паловай гады за абразу супрацоўніцы пракуратуры. Частковым складаннем пакаранняў канчаткова палітвязню прысудзілі 20 гадоў калоніі ўзмоцненага рэжыму.