Пуцін спрасціў атрыманне грамадзянства РФ для асобных катэгорыяў украінцаў

Прэзідэнт Расіі Уладзімір Пуцін падпісаў указ, паводле якога ўводзіцца спрошчаны парадак атрымання расійскага грамадзянства для некаторых катэгорыяў грамадзянаў Украіны. Атрымаць пашпарты РФ у спрошчаным парадку могуць асобы, якія нарадзіліся і жылі ў Крыме да 18 сакавіка 2014 года, а таксама былі дэпартаваныя з Крыму ў савецкія часы.

Таксама дзеянне ўказу распаўсюджваецца на грамадзянаў Украіны і асобаў без грамадзянства, якія жылі “у асобных раёнах Данецкай і Луганскай” абласцей да красавіка 2014 года, а цяпер маюць від на жыхарства і некаторыя іншыя дакументы, якія дазваляюць ім жыць у Расіі.

Заявы на прыём у грамадзянства РФ не павінны разглядацца болей за тры месяцы, паведамляе meduza.io

24 красавіка Пуцін падпісаў указ, па якім жыхары самаабвешчаных ДНР і ЛНР могуць атрымаць у такім парадку пашпарт Расіі. 29 і 30 красавіка ў Растоўскай вобласці ў тэставым рэжыме пачалі працаваць першыя пункты выдачы пашпартоў для такіх асобаў.