У Беларусі адпрацоўвалі рэагаванне на радыяцыйную аварыю на Астравецкай АЭС
Астравецкая АЭС / t.me/rspch_by/
23 красавіка ў Беларусі адпрацоўвалі рэагаванне на радыяцыйную аварыю на Астравецкай АЭС. Была праведзена "рэспубліканская супрацьаварыйная трэніроўка сістэмы сітуацыйна-крызісных цэнтраў". У ёй паўдзельнічалі прадстаўнікі атамнай станцыі, ратавальнікаў, Мінаховы здароўя, Мінпрыроды, Мінэнерга і Нацыянальнай акадэміі навук.
У выпадку згаданай аварыі сітуацыйна-крызісны цэнтр Мінаховы здароўя павінен даць ацэнку доз апраменьвання насельніцтва і прагноз наступстваў для здароўя пацярпелых, падрыхтаваць рэкамендацыі па арганізацыі і аказанні меддапамогі, лекавага забеспячэння.
Падчас згаданай трэніроўкі Навукова-практычны цэнтр гігіены падрыхтаваў "прагноз наступстваў радыяцыйнай аварыі" на БелАЭС для насельніцтва, ацаніў неабходнасць увядзення ахоўных мерапрыемстваў у залежнасці ад прагназуемых доз апраменьвання людзей (сярод іх — эвакуацыя насельніцтва). Яго разлікі прызналі супастаўнымі з атрыманымі прагнозамі ўстаноў іншых ведамстваў.
