У Мінску адкрываюцца тры станцыі Зялёналужскай лініі метро

У Мінску адкрываюцца тры станцыі Зялёналужскай лініі метро. Гэта "Аэрадромная", "Немаршанскі сад" і "Слуцкі гасцінец". Іх будаўніцтва заняло больш за 7 гадоў.

У панядзелак на станцыях пабываў Аляксандр Лукашэнка, а пасажыраў на іх прапусцяць а 16-й гадзіне.

Лукашэнка не задаволены тэмпамі будаўніцтва метро. "Усё, здаецца, добра, але павольна, — гаварыў ён. — Катастрафічна павольна! Трэба хутчэй — у два разы. Нікуды не дзенемся, у Мінску трэба рабіць метро сапраўднае, добрае метро... Не трэба пад зямлю заганяць палацы. Лепш зробім прасцей станцыі, але больш".

Таксама Аляксандр Лукашэнка паўтарыў сваю ідэю звязаць гарады-спадарожнікі са сталіцай з дапамогай наземнага метро: "Будзем планаваць і прыглядацца". Упершыню ён прапанаваў такі праект у кастрычніку. "Не будзем капаць, як крот, пад зямлёй гэтыя траншэі, а можам выйсці на паверхню ў канцы контураў Мінска і даехаць да тых жа Смалявічаў, Лагойска і гэтак далей", — гаварыў ён.

У Мінску пачалі праектаваць 4-ю лінію метро — кальцавую. На ёй будзе 17 станцый.