У Мінску заявілі пра пагадненне з найбуйнейшым спажыўцом калія ў свеце
Беларуская калійная кампанія заявіла пра дасягнутае 10 лютага пагадненне "з найбуйнейшым спажыўцом калія ў свеце". Гэта — Кітай. Цана 247 долараў за тону ўстаноўлена да канца года. Яна на 27 долараў вышэйшая за папярэдні кошт.
У канцы студзеня стала вядома пра падпісанне БКК пагаднення з індыйскай IPL на пастаўку 800 тысяч тон угнаенняў. Цана была такая самая — 247 долараў за тону. "Уралкалій" заявіў, што гэтая цана "неадпаведная рынку". Беларусаў абвінавацілі ў дэмпінгу.
"Падпісанне новага кітайскага кантракту ўслед за заключаным індыйскім стварае трывалы падмурак для ўстойлівага попыту на калій і стымул для станоўчай цэнавай дынамікі", — адзначаюць у Беларускай калійнай кампаніі. Там лічаць, што пагадненне — гэта "наступны заканамерны крок ва ўмацаванні стабільнасці сусветнага рынку калію і пазітыўны сігнал для далейшага росту коштаў у іншых рэгіёнах".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
