У Расіі заблакавалі доступ да Viber
Чарговыя абмежаванні ў РФ (ілюстрацыйнае фота) / pixabay.com
У Расіі абмежавалі доступ да Viber. Раскамнагляд знайшоў "парушэнні патрабаванняў расійскага заканадаўства" і "супрацьпраўную інфармацыю". Гаворка ідзе пра пагрозу выкарыстання месенджара "ў тэрарыстычных і экстрэмісцкіх мэтах, вярбоўкі грамадзян для іх здзяйснення, продажу наркотыкаў".
А паводле звестак ТАСС, пракуратура выявіла факты выкарыстання Viber "для дэстабілізацыі палітычнага становішча ў РФ".
Viber трэці па папулярнасці месенджар у РФ (наперадзе — WhatsApp і Telegram). Штомесяц ім карыстаецца 26% насельніцтва, штодня — каля 14%. У Беларусі сёлета апублікавалі вынікі апытання, паводле якога сярод месенджараў 70,4% апытаных выкарыстоўваюць якраз Viber.
Уладальнікам месенджара з'яўляецца міжнародная кампанія Viber Media з галоўным офісам у Люксембургу, з офісамі распрацоўкі ў Беларусі і Ізраілі.
