Вячорка: выхад з турмы Хершэ — вынік санкцыяў і швейцарскай дыпламатыі

Вячорка падкрэслівае, што не хоча называць тое, што адбылося, "вызваленнем": "Замест турмы яна [Наталля Хершэ] атрымала высылку, і разумею, што гэта адна з умоваў". Дарадца Ціханоўскай дадае: "Сімвалічна, што ў аэрапорт яе даставілі ў [турэмнай] робе. Беларусь — вялікая турма". "Выхад Хершэ дае надзею, што ўсе закладнікі будуць вызваленыя, спадзяюся, неўзабаве", — піша Франак Вячорка.

Грамадзянка Швейцарыі беларускага паходжання Наталля Хершэ выйшла на волю 18 лютага. За кратамі Хершэ правяла 17 месяцаў, а цяпер вяртаецца ў Швейцарыю праз Турцыю. У снежні 2020 года яна была асуджана ў Мінску на 2,5 года калоніі строгага рэжыму за супраціўленне сілавіку падчас вулічнай акцыі — на адным з жаночых маршаў яна сарвала балаклаву з амапаўца. У зняволенні жанчына паводзіла сябе мужна, аб'яўляла галадоўкі, абараняючы свае правы.