За месяц у Літве выявілі 250 паветраных шароў з Беларусі
Паветраны шар з кантрабандай / Памежная служба Літвы
У верасні літоўскія службы зарэгістравалі 250 паветраных шароў, якія ляцелі з Беларусі. Такую лічбу ў інтэрв'ю BNS называе камандуючы службы аховы дзяржаўнай мяжы Рустамас Любаевас.
Ён кажа, што вайсковыя радыёлакацыйныя станцыі фіксуюць такія аб'екты, а потым перадаюць інфармацыю памежнікам. Такімі шарамі карыстаюцца кантрабандысты пераважна для перапраўкі цыгарэтаў.
Як расказвала Еўрарадыё, на выходных такі паветраны шар з кантрабанднымі цыгарэтамі ўпаў на тэрыторыі аэрапорта Вільні.
У Літве вядуцца дыскусіі, хто павінен збіваць такія шары. Паводле Любаеваса, паветраныя шары хутка дасягаюць вышыні ў 2-5 км, а ў памежнікаў няма чым збіваць іх там.
"Ад красавіка мы заўважылі тэндэнцыю, што кантрабандысты пачынаюць выкарыстоўваць для кантрабанды метэазонды. У жніўні зафіксавана 117 такіх выпадкаў, у верасні мы таксама бачым досыць вялікі рух", — дадае кіраўнік літоўскіх памежнікаў.
На яго думку, для разведкі такія зонды выкарыстоўваць немагчыма, бо яны некіраваныя.
