Збанкрутавала кампанія Юрыя Чыжа, якая кіравала сеткай заправак "Трайпл"

Эканамічны суд Мінска пачаў працэдуру банкруцтва кампаніі "Нафтахімтрэйдынг", піша "Наша Ніва". Гэтая кампанія Юрыя Чыжа кіравала сеткай заправак "Трайпл". Як вынікае з матэрыялаў справы, кампанія вінная крэдыторам больш за 4,5 мільёна долараў.

Пазоў з патрабаваннем банкруцтва "Нафтахімтрэйдынга" падаў яго асноўны крэдытор "Банк ВТБ" (Беларусь). У закладзе ў банка ўжо ёсць два аб'екты нерухомасці "Нафтахімтрэйдынга". Выданне мяркуе, што, "імаверна, гаворка ідзе пра непрададзеныя АЗС". Сама кампанія-даўжнік дагэтуль лічыцца дзейнай арганізацыяй. У яе штаце лічацца 5 супрацоўнікаў, праўда, трое з іх — у дэкрэтным адпачынку. Аднак фактычна кампанія не працуе — яе пазбавілі ліцэнзіі яшчэ ў 2021-м годзе.

Прадстаўнікі кампаніі-даўжніка пярэчылі супраць пачатку працэсу, аднак суд адкрыў справу аб банкруцтве і прызначыў чарговае пасяджэнне на 27 чэрвеня.

Юрый Чыж, які быў адным з блізкіх да Аляксандра Лукашэнкі бізнесоўцаў, трапіў у няласку ў 2016 годзе. Яго затрымалі паводле падазрэння ва ўхіленні ад сплаты падаткаў. Валерый Вакульчык, які ў той час быў кіраўніком КДБ, казаў, што камерсант быў затрыманы падчас спробы пакінуць краіну на аўтамабілі. У верасні 2016 года Юрыя Чыжа выпусцілі. Увесну 2021 года яго зноў затрымалі і зноў выпусцілі ўвосені 2022 года. У лютым 2023 года нарэшце адбыўся суд. Ён прысудзіў Чыжа да трох з паловай гадоў пазбаўлення волі. Ад адбыцця тэрміну яго вызвалілі — праз амністыю і час, праведзены пад вартай у 2016 і 2021-2022 гадах.