ЗША хочуць увесці для Месяца ўласную сістэму адліку часу
Любое адхіленне можа адправіць касмічны апарат на няслушную арбіту / Anadolu Agency via Getty Images
ЗША хочуць увесці для Месяца ўласную сістэму адліку часу. Такую задачу NASA паставілі ў Белым доме. Справа ў тым, што сіла прыцягнення на Месяцы ніжэй, чым на Зямлі, і час там рухаецца хутчэй, апярэджваючы зямны на 58,7 мікрасекунды ў дзень. Атрымліваецца, што розніца ў адну секунду назапашваецца за 46-47 гадоў. На першы погляд гэта няшмат, але для сінхранізацыі касмічных палётаў нават такая розніца можа быць істотнай, паведамляе "Бі-Бі-Сі".
NASA — не адзіная арганізацыя, якая хоча ўвесці месяцовы час. Распрацоўкай сваёй сістэмы адліку часу займаецца і Еўрапейскае касмічнае агенцтва. Таму ў будучым яшчэ давядзецца дамаўляцца і ствараць каардынуючую арганізацыю, функцыі якой у цяперашні час выконвае Міжнароднае бюро мер і вагаў.
Адно з дыскусійных пытанняў, з якога моманту варта ўводзіць новую сістэму адліку часу. ЗША хацелі б увесці яе да 2026 года, да часу, на які запланаваны пілатуемы палёт на Месяц (місія "Артэміда-3"). Для яго поспеху спатрэбіцца гранічна дакладнае планаванне аж да нанасекунд — любое адхіленне можа адправіць касмічны апарат на няслушную арбіту.
