Аляксандру Кныровічу працягнулі тэрмін знаходжання пад вартай
![Аляксандру Кныровічу працягнулі тэрмін знаходжання пад вартай](/sites/default/files/styles/gallery_main/public/2023-08/kny2.jpg.webp?itok=nfJF2p88)
Сузаснавальніку групы кампаній "Сармат" Аляксандру Кныровічу на дзесяць дзён працягнулі тэрмін знаходжання пад вартай. 72 гадзіны, на якія ён быў затрыманы, скончыліся 28 студзеня каля 23:00. Пра гэта Еўрарадыё паведаміў бацька прадпрымальніка Станіслаў Кныровіч:
"Улічваючы тое, што яму прад'яўляюць, адвакат сказаў, што за 72 гадзіны мы не "закрыемся". Мусяць прайсці як мінімум два допыты ў следчага. Таму ён сказаў, што мінімальны тэрмін — плюс яшчэ дзесяць сутак".
Станіслаў Францавіч кантактуе з сынам праз адваката. Па яго словах, ужо адбыўся першы допыт Аляксандра Кныровіча ў якасці падазраванага. Але абвінавачанні кіраўніку "Сармат-СТІ" яшчэ не прад'яўленыя. "Ёсць пункт гледжання следства, а ёсць пункт гледжання Аляксандра", — лаканічна каментуе гэтую акалічнасць Станіслаў Кныровіч.
Наступная сустрэча Аляксандра Кныровіча з адвакатам мусіць адбыцца ў аўторак, 31 студзеня. Пакуль жа сваякі перадалі бізнесмену цёплыя рэчы (па словах Станіслава Кныровіча, у "амерыканцы" сыра) і лекі.