Амерыканец, абвешчаны ў вышук праз ФБР, адкрыў рэстаран у Брэсце
Эван Ньюман у сваім рэстаране / фота са старонкі ў Інстаграме
Рэстаран у Брэсце адкрыў амерыканец, які штурмаваў Капітолій і якога абвясціла ў вышук ФБР. Эван Ньюман удзельнічаў у штурме Капітолія ў студзені 2021-га, а потым атрымаў палітычны прытулак у Беларусі.
Днямі ён адкрыў закусачную "Route 66". Як сцвярджаюць блогеры, там ён сам і гатуе тыповыя амерыканскія стравы: бургеры, стэйкі, сэндвічы. У Інстаграм-акаўнце рэстарана ён называе сябе Эван Джэферсан, заўважыла выданне bgmedia.site. Брастаўчане кажуць, што часам мужчына таксама прадстаўляецца як Стыў.
Амерыканца з энтузіязмам піяраць прапагандысты і праўладныя блогеры.
Свой гастранамічны бізнес Ньюман сумяшчае з іншай працай — выкладае англійскую мову ў адной з прыватных школ горада.
