АПЕК пазычыць Беларусі грошай на незразумелых умовах

Фонд міжнароднага развіцця АПЕК дасць Беларусі пазыку на 20 млн долараў. Крэдытнае пагадненне падпісана 24 снежня, паведамляе Мінфін.

Па ўмовах крэдытавання, сродкі павінны быць накіраваны на падтрымку сістэмы аховы здароўя і памяншэнне рызык, звязаных з COVID-19. На які тэрмін і пад які працэнт будзе выдадзена пазыка, не гаворыцца. Незразумела нават, калі сродкі будуць пералічаныя.

На сайце фонду ёсць інфармацыя пра адну аперацыю з Беларуссю — ад 6 ліпеня 2020 года. Гэта таксама была пазыка на $20 млн — і таксама на падтрымку сістэмы аховы здароўя. Але якраз у ліпені каранавіруса ў Беларусі ўжо "не было відаць". Умовы, на якіх давалася першая пазыка ад Фонду міжнароднага развіцця АПЕК, таксама не апублікаваныя.

— Абсалютна непразрыстыя ўмовы крэдытавання. Я б адзначыў два нюансы. Першы — дастаткова невялікая сума, якая кардынальных пытанняў не закрывае. Другі — склад АПЕК — гэта перш за ўсё арабскія краіны і краіны Блізкага Усходу, асобныя краіны Афрыкі, Паўднёва-Усходняй Азіі, Паўднёвай Амерыкі. Большасць з іх не вылучаецца дэмакратычнасцю рэжымаў, — кажа старшы аналітык "Альпары Еўразія" Вадзім Іосуб.

На думку эксперта, гэтыя краіны лёгка закрываюць вочы на праблемы з правамі чалавека і празрыстасцю выбараў, таму і пазычаюць беларускаму ўраду. Ці пойдуць гэтыя сродкі на ахову здароўя?

— Або гэта мэтавая пазыка і крэдыторы будуць кантраляваць кірунак грошай. Або больш магчымы варыянт — грошы трапяць у распараджэнне Мінфіна і могуць быць выдаткаваныя ім па сваім меркаванні.

Але ў любым выпадку гэта і дапаможа не моцна, і павялічыць наш доўг не моцна. Штогадовыя выплаты па вонкавым доўгу — каля 3,5 мільярда долараў. Гэта значыць, 20 мільёнаў долараў — гэта крыху больш, чым паўпрацэнта ад таго, што нам на працягу года трэба вярнуць.

Як заявіў 17 снежня першы намеснік міністра фінансаў Дзмітрый Кійко, сёлета на барацьбу з каранавірусам з бюджэту дадаткова выдзелена 600 млн рублёў. Па цяперашнім курсе гэта каля $231 млн.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.