Беларусь уводзіць абавязковую дэзінфекцыю транспарту на мяжы
Беларусь уводзіць абавязковую дэзінфекцыю транспарту на мяжы. Быў падпісаны адпаведны ўказ. Зроблена гэта "у мэтах зніжэння рызыкі ўвозу на тэрыторыю краіны ўзбуджальнікаў небяспечных інфекцый і бактэрый", паведамляе president.gov.by.
З ліпеня 2021-га ў пункце пропуску "Новая Гута" на беларуска-украінскай мяжы праводзіўся эксперымент. Там была абавязковая дэзінфекцыя транспартных сродкаў. Ёй падлягалі аўтобусы, легкавыя і грузавыя аўтамабілі (з замежнага боку). Агулам працэдуру прайшлі больш за 60 тысяч транспартных сродкаў.
Дзяржаўная ветэрынарная служба даследавала пробы, узятыя да правядзення дэзінфекцыі. Высветлілася, што частка з іх паказала станоўчы вынік на наяўнасць кішэчнай палачкі і залацістага стафілакока. Па выніках эксперыменту збіралася міжведамственная працоўная група пры Міністэрстве сельскай гаспадаркі і харчавання, якая "прыняла рашэнне распаўсюдзіць атрыманы вопыт на ўсе пункты пропуску на межах Беларусі". Вось такое тлумачэнне. А на справе — яшчэ адзін варыянт зарабіць грошы на мяжы.
У якасці арганізацыі, якая будзе аказваць паслугі па абавязковай дэзінфекцыі, прызначанае ТАА "БелГлабалГарант". Аплата будзе праводзіцца шляхам набыцця кантрольнай маркі ў Белдзяржстраху і Беларусбанку — у пунктах пропуску праз дзяржаўную мяжу.
