Беларуская сетка “Тры цаны” выходзіць на рынак Расіі, кідаючы выклік Fix Price
Кампанія імкнецца да гадавога тавараабароту ў $1 млрд / 3ceni.by
Беларуская сетка крамаў “Тры цаны” збіраецца актыўна пашырацца ў Расіі і стаць другім нумарам у сегменце дыскантэраў, піша “Камерсант”. Цяпер у РФ працуе толькі восем крамаў сеткі, але заяўлены амбіцыйны план павелічэння іх колькасці да 220.
Расійскія эксперты адзначаюць, што “Тры цаны” сутыкнуцца з жорсткай канкурэнцыяй з боку такіх буйных гульцоў, як Fix Price і “Галамарт”. Аднак галоўнай перавагай “Трох цэн” з’яўляюцца тавары з Беларусі, і гэтым можна прыцягнуць пакупніка, адзначаюць эксперты.
Чым гандлююць “Тры цаны” і чым прывабяць расіян?
Сетка пазіцыянуе сябе як рытэйлер тавараў для дома, гаспадарчых дробязяў, бытавой хіміі і прадуктаў доўгатэрміновага захоўвання. Увесь асартымент выраблены ў Расіі, Беларусі і Кітаі. Эксперты лічаць, што ў новага гульца ёсць шанцы на пэўны поспех у Расіі.
Глава кампаніі “Infoline-Аналiтыка” Міхаіл Бурмістраў лічыць, што фармат фіксаваных цэн па-ранейшаму застаецца запатрабаваным:
“Спажыўцы захоўваюць высокі ўзровень зацікаўленасці ў прывабным прайсе і ашчадную мадэль паводзін, нягледзячы на рост даходаў. У гэтым плане рытэйлеры, якія прапануюць празрыстую шкалу цэн, заўсёды знаходзяць свайго пакупніка”.
Акрамя прамых канкурэнтаў, сетка “Тры цаны” сутыкнецца з сур’ёзным выклікам з боку маркетплэйсаў.
Галоўная праблема — недахоп фінансавых рэсурсаў. Каб выйсці на рынак, патрабуецца значны капітал, бо акрамя арэнды памяшканняў і закупкі тавараў, кампанія сутыкнецца з павышанымі выдаткамі на персанал.
“Фонд аплаты працы ва ўсіх рытэйлераў вырас на 20-50%, а ў дыскантэры нельга проста падняць цэны на тавары, каб кампенсаваць выдаткі. Бізнес у гэтым сегменце ахвяруе маржой”.
Супраць каго выйшла беларуская сетка?
На дадзены момант у Расіі найбуйнейшы гулец — гэта Fix Price, у якога больш за 6 000 крамаў па ўсёй краіне. Другім застаецца “Галамарт” з 500 гандлёвымі кропкамі.
Эксперты ўпэўненыя, што беларускі праект можа быць паспяховым, але толькі пры актыўнай экспансіі і граматным кіраванні выдаткамі.
Сетка павінна хутка маштабавацца, прапаноўваць канкурэнтныя цэны і актыўна рэкламавацца.
