Беларускія памежнікі рыхтуюць на мяжы з Украінай фотапасткі для парушальнікаў
Нарада ў Давыд-Гарадку / gpk.gov.by
У пытаннях аховы мяжы з Украінай Дзяржпамежкамітэт Беларусі супрацоўнічае з Міністэрствам лясной гаспадаркі. У Давыд-Гарадку ў Столінскім раёне прайшла сустрэча першага намесніка памежкамітэта генерал-маёра Ігара Буткевіча і міністра лясной гаспадаркі Аляксандра Куліка. Гаворка ішла пра абсталяванне мяжы з Украінай на лясіста-балоцістай мясцовасці. Беларускія памежнікі вельмі перажываюць, што "з-за такіх складаных ландшафтных умоў адсутнічае магчымасць уладкоўваць класічныя рубяжы аховы з кантрольна-следавой паласой і інжынернымі загародамі".
Плануецца, што каля беларуска-ўкраінскай мяжы з'явяцца "самыя сучасныя тэхнічныя сродкі аховы рознага прынцыпа дзеяння". Згадваюцца "сейсма- і радыёпрамянёвыя датчыкі", а таксама "розныя тыпы фотапастак і іншыя прыборы, якія дазваляюць не толькі выявіць парушальніка мяжы, але і высветліць кірунак яго руху".
У той час, калі ў РБ баяцца "дыверсантаў з Украіны", украінцы працягваюць ўмацоўваць сваю мяжу на выпадак агрэсіі з боку Беларусі. На мяжы працягваецца і "ідэалагічнае супрацьстаянне".
