Беларускую палітзняволеную Сафію Сапега могуць перадаць у Расію

Сафію Сапега разам з Раманам Пратасевічам знялі з борта самалёта Ryanair, які ляцеў з Афінаў у Вільню і быў пасаджаны ў Беларусі 23 траўня 2021 года. У пачатку траўня 2022-га яна была асуджана на шэсць гадоў калоніі агульнага рэжыму. Суд пастанавіў спагнаць з Сафіі каля 175 тысяч рублёў (167 500 рублёў кампенсацыі маральнай шкоды "пацярпелым" і 7 488 рублёў судовай пошліны).

Дзяўчыну прызналі вінаватай па сямі артыкулах Крымінальнага кодэкса ("распальванне сацыяльнай варожасці", "незаконныя дзеянні ў дачыненні да інфармацыі аб прыватным жыцці..." і г. д.). Яна адміністравала тэлеграм-канал, дзе публікаваліся асабістыя звесткі беларускіх сілавікоў.

Сваякі Сафіі разлічвалі на памілаванне. Яна заключала дасудовае пагадненне са следствам, пісала прашэнне аб памілаванні на імя Лукашэнкі, была пад хатнім арыштам. Але пасля абвяшчэння прысуду яе ўзялі пад варту.