Чыноўнікі МАРГ знайшлі на Wildberries забароненыя тавары

Міністэрства антыманапольнага рэгулявання і гандлю выявіла парушэнні заканадаўстіва ў інтэрнэт-краме Wildberries.

У прыватнасці, чыноўнікі пабачылі, што там прадаюцца забароненыя парфума, касметыка ды іншыя тавары, "вырабленыя ў краінах, якія ўвялі санкцыі і праводзяць недружалюбную палітыку ў дачыненні да Беларусі".

Таксама чыноўнікі выказалі іншыя прэтэнзіі:
— няма інфармацыі пра многіх вытворцаў тавараў;
— на галоўнай старонцы інтэрнэт-крамы няма інфармацыі пра спосабы аплаты тавараў;
— вяртаюць грошы на баланс асабістага кабінета, а не на рахунак спажыўца.

Інтэрнэт-платформе выдалі прадпісанне ліквідаваць парушэнні заканадаўства і спыніць продаж забароненых тавараў.

Інтэрнэт-крама Wildberries мае ў Беларусі больш за дзве тысячы пунктаў выдачы заказаў (сваіх і партнёрскіх).

У 2022 годзе ў МАРГ і выканкамы на працу гэтай інтэрнэт-крамы паступіла каля 1,5 тысячы скаргаў, у 2023-м — 2 тысячы, у 2024-м — 1 тысяча. Ад пачатку 2025 года і па сёння — ужо больш за 100.