Дачка эмігрантаў з Беларусі стала алімпійскай чэмпіёнкай
Зборная ЗША ў фэхтаванні на рапірах. Жаклін Дубровіч — крайняя злева / AFP
Дачка эмігрантаў з Беларусі стала алімпійскай чэмпіёнкай. Жаклін Дубровіч выступала ў фехтаванні на рапірах у складзе зборнай ЗША. Тытул алімпійскай чэмпіёнкі яна атрымала ў камандным заліку разам з трыма сваімі калегамі пасля перамогі над італьянкамі, паведамляе Радыё Свабода.
Дубровіч жыве ў Мэйплвуд, штат Нью-Джэрсі, скончыла Калумбійскі ўніверсітэт у 2016 годзе, дзе вывучала расійскую літаратуру. Бацькі спартсменкі эмігравалі з Беларусі ў канцы 1980-х.
Гэта другая Алімпіяда 30-гадовай амерыканкі. На Алімпійскіх гульнях-2020 у Токіё, што праводзілі ў 2021 годзе, яна таксама выступала за зборную ЗША.
"Без адвагі, упартасці і ахвярнасці маіх бацькоў нічога гэтага не было б магчыма... Мае бацькі эмігравалі ў гэтую краіну з Савецкага Саюза, каб атрымаць лепшы шанец на жыццё для сваіх дзяцей, і я ведаю, што яны нават у самых смелых марах не маглі сабе ўявіць, што іх дзіця будзе прадстаўляць Злучаныя Штаты Амерыкі на Алімпійскіх гульнях", — напісала Жаклін Дубровіч у Instagram.
