Два сцягі, два гербы, два чаты GPT і адно вялікае каханне — іх норавы

Так, прафсаюз баіцца, што стрымінгі пачнуць выкарыстоўваць згенераваныя камп'ютарам асобы і галасы і рана ці позна адмовяцца ад жывых акцёраў. Пакуль доўжыцца страйк, акцёры не толькі не будуць здымацца ў новых праектах — яны не будуць удзельнічаць у рэкламных кампаніях ужо знятых фільмаў.

Сёння цягам дня можна чакаць навін пра тое, як акцёры пікетуюць штаб-кватэры Netflix, Paramount, Warner Bros і Disney.

Што ўсё гэта значыць для нас? Самы час шукаць новую форму эскапізму, бо новы сезон серыяла можа выйсці не хутка.

Ізраільская судовая рэформа. Другі сезон

А другі сезон пратэстаў у Ізраілі супраць скандальнай судовай рэформы ўжо выйшаў. І на гэтым тыдні дзясяткі тысяч дэманстрантаў адправіліся на вуліцы, каб сказаць, што яны думаюць пра планы ўрада ўсё ж правесці гэтую рэформу.

Гэтая судовая рэформа ў цэлым — пакет законаў, якія дадуць ізраільскаму парламенту і, адпаведна, кіроўным партыям большы кантроль над судовай сістэмай Ізраіля, піша CNN.

Прэм'ер-міністр Біньямін Нетаньяху і яго саюзнікі кажуць, што рэформы неабходныя для пераразмеркавання паўнамоцтваў паміж судамі, заканадаўцамі і ўрадам. Але праціўнікі плана кажуць, што ўсё гэта можа ператварыць Ізраіль у дыктатуру.

У сакавіку пасля ўсеагульнай забастоўкі Нетаньяху прыпыніў працэс прыняцця рэформы —забастоўка тады спыніла большую частку эканомікі Ізраіля. Спыніўся транспарт, закрыліся ўніверсітэты, рэстараны і крамы. Нават ключавыя саюзнікі Нетаньяху, у тым ліку ЗША, выказалі "занепакоенасць" тым, што ён робіць.

Пасля гэтага Нетаньяху сказаў, што з пакета рэформаў прыбяруць самы спрэчны законапраект. Па ім Кнесету хацелі дазволіць адмяняць рашэнні Вярхоўнага суда.

Але адмяніць усю рэформу цалкам прэм'ер не абяцаў, і галасаванне ў парламенце на гэтым тыдні азначае, што ён узяўся за старое. І ізраільцяне паказалі, што яны таксама гатовыя ўзяцца за старое.

Куды прыводзіць "свой шлях"

У адной краіне жорстка задушылі пратэсты, а потым аказалася, што ніхто ў свеце не хоча падаць табе рукі. Па кантракты давялося ехаць у Афрыку.

Гэта зноў не тое, пра што вы падумалі. Проста прэзідэнт Ірана Эбрахім Раісі сказаў, што ў яго "новы пачатак" у адносінах з афрыканскім кантынентам. І паехаў у тур па трох краінах — Кеніі, Угандзе і Зімбабвэ.

CNN піша, што гэта спроба Раісі дыверсіфікаваць эканамічныя сувязі — краіна знаходзіцца пад санкцыямі ЗША

Іран пачаў паглядаць на краіны, якія развіваюцца, яшчэ ў 2018 годзе, калі прэзідэнт ЗША Дональд Трамп адмовіўся ад ядзернага пагаднення з Тэгеранам і ўвёў санкцыі. Раісі спрабуе наладзіць кантакты не толькі з Афрыкай, але і з Лацінскай Амерыкай, каб знайсці падтрымку іншых краін, таксама абкладзеных амерыканскімі санкцыямі.

Вы таксама заўважылі, што кожны раз, як якая-небудзь краіна заяўляе пра "свой шлях", гэты шлях абавязкова заводзіць у паўднёвае паўшар'е?

Два прэзідэнты, два "Байполы", два чаты GPT

На той жа планеце Ілан Маск стварае новую кампанію па распрацоўцы штучнага інтэлекту. На сайце кампаніі пазначаная нетрывіяльная задача: Маск з камандай хоча "зразумець сапраўдную прыроду сусвету".

У красавіку, дарэчы, ён анансаваў, што запусціць нешта накшталт "правільнага" GPT-чата.

"Я называю яго TruthGPT, або ШІ, які максімальна шукае ісціну і спрабуе зразумець прыроду сусвету", — цытаваў Маска New York Post.